من الدايركت
انا متعوده كل ماأغسل عبايه لي لازم عقبها ابخرها و اطيبهاا و اخلي ريحتهاا تعجعج و كنت ادري الله يتوب علي انه مايجوز تطلعين مكان و ريحتك كلهاا عطور بس انا من النوع احب ريحة البخور بالشيله و العبايه و كنت متهاونه بالأمر استغفرك ياارب . و الموقف هو مره كنت طالعه مع اختي و كالعاده قبلها كانت عبايتي مغسوله و معطرتها بعطر البنفسج اللي من جنيد و معروف ريحته قويه مرره المهم لبستهاا و طلعنا و رحنا للسويكت هو معروف شارع و كله محلات و مرينا على هندي يبيع عود و مريت من عنده و قاعد يجرب هالعود و انا اخذ و اشمشم المهم دخلنا محل مجوهرات و قاعدين نسوم الذهب و قبل لانطلع وقفني راعي المحل سعودي قال لو سمحتي ايش عطرك ؟! يوم قالهاا حسيت بطني مغصني و قلبي يرقع قلت مدري و اطلع على طول و من يومهاا و انا ماعاد اطيب عبايتي و سبحاان الله كأن هالسؤال كان صحوه لي من شيء كنت متهاونه فيه للأسف.
لا اله الا انت سبحانك اني كنت من الظالمين

من الدايركت

ودي اوجه نصيحة اخلاقية وتربوية لكل طالبة في مدرسه
عن شي بدا ينتشر كثييير في مدارسنا وشيء ذميم جداً ويحسبونه برستيج وحركات ،
اللي هو نظام "شلتي شلتي" ، ماقد مر عليكم ؟ مافهمتوا؟ اقرب مثال له ... تدخل الاستاذه
وتقول يالله سووا مجموعات تقوم كل وحده تخمخم صديقاتها ويقولون استاذه خلصنا ،
فجأه تشوف الاستاذه ان بنت ولا بنتين باقي مادخلوا في مجموعات ، فلانه أنتي مع مين ؟
استاذه مدري مو مع احد ، طيب مين ياخذ فلانه ؟ ولا رد ... ، أقول مين يأخذ فلانه ؟ولارد ايضا ..
ترى أنا اللي بختار مجموعتها ، وتأشر على بنات ؛تعالي معهم يافلانه ، لااا استااذه ما نبي ،
وش اللي مانبي ؟؟ ، استاذه تكفين خلينا كذا ، طيب وانتوا ؛وتأشر على مجموعه ثانية ، لاا استاذه
كثيرين حنا ، ويستمر الوضع والبنت متفشله وكارهه نفسها بسبب انانيتهم وعنصريتهم ،
هذا مجرد مثال ولا في اشكال اسوء من كذا .. والمشكله كثير نسمع الدنيا دوارة، وكما تدين تدان ، بس ليتنا نطبق ! ابي اعرف وش تستفيدون يومكم خليتوا البنت زي كيس الزبالة تتعازمون على لمه ؟
أي برستيج هذا اللي يخليكم تحقرون وحده انخلقت من تراب زيكم ؟
محد يبي يقعد جنبها ، محد يبي يسولف معها ، لدرجه صارت عقده من اول ماتجين مدرسه جديده
تلقين بنات تفكيرهم أي شلة لازم يروحون لها ؟ووش المتطلبات عشان يقبلونها هالشله؟ تسمع اغاني ؟
ولا تحب تتهزا ؟ ولا منحرفه ؟
ولا تشوفين راعية الشلة والبرستيج في الفصل ان تهاوشت مع وحده لزوم على باقي الفصل كلهم
يسحبون على هالبنت ويحقرونها، اشياء عجيبه تشوفونها وكلها تطلع من الهيبة اللي ما يستحقها
الا رب العالمين.
يعني ابسألك الحين هذي القوة والهيبة اللي اكتسبتيها وقدرتي فيها تذلين بشر مثلك بتنفعك عند ربك؟
بينفعونك البنات اللي ملاحقينك كالعبيد في ذاك اليوم العظيم ؟ بتفرحين وانتي تشوفين ذيك البنت
وهي تقول يا ربي هذي ظلمتني واذتني خذ حقي منها ؟ وابشرك البنات اللي مساعدينك في الحفاظ
على هذي المكانة بيهربون منك وهم يقولون نفسي نفسي ، وهيبتك بتروح وترجعين ذليلة مثلك مثل
الناس اللي تشوفينهم حشرات وقتها ،
كثير اشوف واسمع بهالمواقف ، واستغرب البنات يوم يسوون كذا كأن مالهم رب قادر وجبار !
وازيد أحفظوااا ألسنتكم أحفظوااا ألسنتكم أحفظوااا السنتكمممم

#لا اله الا انت سبحانك اني كنت من الظالمين

من الدايركت

قبل خمس سنوات كنت حامل بالشهر الاخير ودخل علينا اخوي انا وخواتي وقال ان صديقه فقير ومحتاج من تبي تتصدق عليه فاكلنا اعطيناه المقسوم وانا اعطيته ميتين ريال صدقه بنية ان الله يسهل علي حملي وولادتي ويوم جاء بكرا وانا افتح دفتري والقی فيه سبعمية ريال ماادري من وين جت مع اني امس كنت فاتح الدفتر وماكان فيه شي وسألت اهلي عن الفلوس وقالوا ما ندري عنهم شي وبعد كم يوم رحت للدكتور متابعه للحمل ومن يوم كشف علي علی طول اعطاني تحويل وقال اللحين تروحين للمستشفی ويولدونك اليوم قلت ليه قال جاء وقت ولادتك ورحت للمستشفی وولدوني بقيصريه لان الطفل كان جالس وجبت بنيه حليوه وبعد ماقمت بالسلامه بعد اسبوعين رحت للدكتور اتطمن علی جرح العمليه قالي احمدي ربك ليل ونهار لو ما ولدتي هذاك اليوم كان كان توفيتي او توفي الجنين او صار عندك.تشنج طول العمر لان كان عندي تسمم بالحمل بسبب ارتفاع الضغط والسكر والحمد لله والشكر علی نعمه

#سبحان الله وبحمده
سبحان الله العظيم

من الدايركت

انا متزوجه لي ثلاث سنوات تقريبا زوجي عمره ماجاب لي هدية حتى دايم اطلبه اقوله جيبلي ورد لو مره يقولي الورد بيخرب ومابتستفيدي شي ، اخر شي قالي في مشروع بجنب البيت اذا خلص اكيد بيزرعون ورد اوعدك كل مارجعت من الدوام قطفت لك وحده 😩 من تزوجت والمشروع لا بدا ولا خلص .
يوم عزمت خالته عندنا ودخل علي ذاك اليوم بكيس من اكسترا قالي جبت لك هديه وهذي خالتي تشهد اني جبت لك عشان بعدين ماتقولين اني ما اجيب لك هدايا الهدية كانت مسجل يقول حطيه بالمطبخ وشغلي الراديو على اذاعة القران
اانا ابدا مافرحت بالهديه ( الناس تجيها عطور ساعات مكياج ذهب وانا يوم افتكرني جاب لي مسجل )
حطيت الكرتون بجنبي وقاعده اقلب بالكاتلوج قالي افتحي الكرتون شوفيه قلت مسجل اعرف شكله مايحتاج
مرت الايام والشهور والراديو شغال على اذاعة القران ماغيرت ولا قفلته بما ان اغلب شغلي بالمطبخ صرت مع الايام احفظ ايات كثيره ، مع الايام سمعت احاديث كثيره كنت ناسيتها بما اني تخرجت من الثانوي من زمان ، صرت اسمع محاضرات دينيه ، صرت اسمع فتاوي وعرفت اشياء كثيره كنت جاهلتها ، القران ليل نهار شغال ببيتي ، قد ايش في سكينه وهدوء بالبيت سورة البقره تقريبا يوميا اسمعها ببيتي ،على قد ماكنت زعلانه ع الهديه الا اني مبسوطه فيها اللحين ومن هذا المنبر اشكر زوجي العزيز عليها
ونصيحه مني حطوا راديوا بالمطبخ وخلوه على اذاعة القران لك اجر كبير باذن الله على سماع القران وحضور مجالس الذكر اهدوه من تحبون وذكروا فيها كل غالي عليكم
#استغفر الله العظيم
استغفر الله العظيم

من الدايركت

حنا مثل كل أهل الرياض كل ما جا وقت المطر والربيع فحطنا مع عماني للثمامه و طقينا الخيمه ونجلس للمغرب بعدها نرجع للبيوت عشان البرد المهم ذاك اليوم طلعنا للبر زي كالعاده بس الجوو كان يجنن غيوووم وترش عالخفيف يوم جينا بنعزل المغرب عشان نمشي وهي الي تمطر وعيوني وعيون بنات عماني بدت تغورق بالدموع نترك هالجو وكل واحد يروح لبيته !!! حرام ونجتمع يالبنات ونروح لعمامي ونترجاهم نقعد قالو صعبه بس يلا بناخذ لكم شاليه تسهرون فيه ورحنا للشاليه الحريم والبزران دخلو داخل الغرف وحنا يالبنات جلسنا تحت مظله كبيره جاني شعور ودي اصيح خواتي وبنات عمامي ومطر يضرب فوقنا وسوالف وضحك (يالله جمع الجنه بس 💕)كنت وقتها بثالث ثانوي وفجاءه كذا من بين السوالف قلت بنات قولوا أمين جعلنا نجتمع السنه الجايه زي هالوقت وبنفس الشاليه وتمطر واصير ادرس بالجامعه طب كلهم أمنو بعدين جلسو يطقطقون علي وش هالدعوه حتى انا مدري وشلون طلعت مني
الزبده اني خلصت ثانوي وانقبلت طب وبديت ادرس تحضيري وجا الشتاء و اجتمعنا بنفس الشاليه وكانت تمطر ونفس الجلسه تحت المظله مع بنات عماني
سبحان الله يا ان دعوتي استجابت 😇 او وحده من البنات الي أمنو استجاب لها ربي
واللحين الحمد لله تخرجت وعندي مقابلة وظيفه الاسبوع الجاي
يلا الله يسهلها علي وتتيسر لي
%يارب وفقني واسعدني واغفر ذنوبي وارفع قدري وارضى عني
انا ومن قالت امين /محد طمع :D