حبيبتي نور شكل اللون اللي علا الدجاجه صوياصوص اوتتبيله جاهزه ام مرق ماجي مااستغني عنه اكلي مايزين الا اذا حطيته طبعاً الكبسه حبتين والايدام حبه ونص او حبه اما بالنسبه للكبسه حبيبتي اول شي تحطين الزيت وتحطين بهارات عدله ناهي مطحونه هيل ثلاث حبات وقرنفل او مسمار اللي تسمونه حبتين وحبه قرفه وفلفل اسود ثلاث اواربع جبات وكزبره بعد ثلاث حبات وتحركين شوين بتطلع ريحتهم تكونين مقطعه البصل قطع صغيره وتضيفينه وتحركين انا زوجي زي زوجك مايحب الثوم طبعا تقطعين الدجاجه نص بعدين تفصلين الفخذ عن الصدر كيف تقطعينها من النص بعدين تضيفينها علا البصل وتحركين لين تتقلقل الدجاجه ويتغير لون الدجاج يصير ابيض وتضيفين الصلصه وبهاراتك والماج وتقلقلينها واضيفين المويه المغليه لين تغطي الدجاج وتقفلين عليها القاتم وياحبيبتي القاتم هو اللي يطلع الاكل لذيذ جربي منك بخسرانه وبعد ماتحسبين للدجاجه ربع ساعه او اكثر اضيف الرز انا استخدم امريكي ابو بنت واستخدم رز عنبر اسمه ايداليا وباب الهند وبسمتي الشعلان والله ماانقعها اغسلها واضيفها علا طول بس اول مايغلي اقفل عليه القاتم وانزل للاخير علا الغاز واخليه يطبخ براحته طبعا قبل مااقفل علا الرز اضيف فلفل حار واذا ماعندي اضيف بارد بالنسبه للايدام طبعا اطبخه بقدر عادي وكيف اسوي فيه اولا اضيف الزيت وبعد البصل واحرك البصل بعدين اضيف البطاطس واقلبها لين احس تغير لونها من برا كانها انقلت بس هي مقطعه قطع وسط مايمديها تنضج بعدين اضيف الكوسه واحركها بعدين اضيف قطع الدجاج طبعا انا استخدم بس صدر دجاجه خاليه من الجلد اقصد نص صدر دجاجه بعدين اقلب لين يتغير لون اللحم بعدين اضيف الباميه واحركها بعدين اضيف الصلصه وبهاراتي وماجي وبعدين المويه المغليه واتركه يتسبك ااقل من نص ساعه طبعا يطلع ايدام رايق ورايب

الحمد لله ما قصروو الخوات

على فكره الكبسه الي علمتك هاذي كبسه بيضاء بالدجاج ابد مافيها ماجي ولا بهارات اما كبسات اللحم هي الي احط لها طماط وماجي وبها ات الطبخ يعتمد على ترتيب الخطوات انتي رتبي الخطوات ولاتشيلينها هم ومع الوقت ان شاء الله بتصيرين مبدعه وطباخه ان شاء الله جربي ان شاء الله مع الوقت تكتسبين خبره أكيد كل وحده فينا مرة بالي تمرين فيه الحين

البنات ماقصروا ربي يعافيهم جميع
بحط لك طريقة كبستي ممكن تعجبك ,, والمقادير اعتمدها بالنظر بس بحاول أقرب لك

-بصله متوسطه ومثلها طماطه قطعيهم مربعات صغيره نوعا ما
-في قدر حطي 4 تقريبا ملاعق زيت زيتون ولابدا يحتر الزيت حطي البصل والطماط
-اغسلي 1 قرن فلفل حار وحطيه معه وحركيه وممكن تغطينه شوي لابدت الحمسه تذبل
حطي الدجاجه وتكونين قبل مقطعتها مثلا نص وغاسلتها ..
-قلبي واضيفي م ص تقريبا بهارات مشكله وانصحك بالبهارات السبعه من اسناد حلوه للكبسات
-وايضا فلفل اسود عدل+كمون عدل لوعندك+حبوب كزبره من كل شي 6 حبات تقريبا+3قرنفل+3هيل
واقطعي قطعة فلفل بارد وحطيها معهم ولاتحطين ليمون اسود موكل ليمون اسود ينفع بعضه يخرب الطبخ
-لاحسيتي الحمسه بدا يتغير لونها وتتسبك طبعا مع التقليب شوي جهزي ما مغلي وانتبهي لهالنقطه!
-اضيفي الما المغلي لين يتغطى الدجاج بس يعني تشوفين طرف علو الدجاجه طالع وخلي النار عاليه الحين وغطيه
-خليها تطبخ 20 دقيقه بس وثم غسلي الرز وارشح لك ملك الارز واحيان اسوي العائله
-غسل الرز مقدار3بيالات حطيه في زبديه وصبي عليه ما وحوسيه بيدك وغسليه كم غسله تقريبا 3 لين تحسين مويته صارت صافيه
-املحي المرق وثم حطي الرز المغسول بدون مويته وثم ذوقي اذا يحتاج شوي ملح زيدي
-خلي النار متوسطه الى عاليه يغلي وماراح يطول وأول ماتشوفين الرز بدا يطلع يعني تشوفينه عن المرق
قصري عليه مره اقصر شي خليه ع نار هاديه مره لان المرقه بتكون شويه ونبيه يستوي ع هياده واضيفي عليه قطع فلفل بارد ابد اقطعي بيدك متوسطه واضيفي كم قطعه وسكريه بالغطا
-تبين تكبسينه ع الدجاج او طلعي الدجاجه بعد 20 دقيقه اللي راحت وحطيها الفرن مع دهنها بشوي صلصه بس عشان تشقر ولعي عليها من فوق
-الكبسه يبيلها تستوي هنا اكثر من ربع تقريبا المهم ممكن بعد الربع تفتحينها وتشوفين استواء الرز وتخلينه يطبخ ع بخار الكبسه بس اهم شي مايحرق
-طفي عنها عقب واغرفيها والدجاجه حمريها من فوق بس لوحابه تحمير
وإن شاء الله تضبط معك

دعواتك ربي يسعدك ويسخر لك

بقولك شي ويمكن تستغربين جربي تغيري القدور وتاخذي قدور اصليه ومعدنها قوي وصناعه مصريه