لاكتساب اي عاده جديده و لمدى الحياه يحتاج الانسان
21 يوم من الاستمرار على هذي العاده دون انقطاع
عشان تتأصل فيه باقي عمره باذن الله
هالموضوع بيكون فضفضه و فلسفه و بحط تفاصيل
الدايت حقي و تجاربي تحت المجهر و مشاعري
اثناء رحلة الدايت و التغيرات اللي لاحظتها
و نزلت بهالفتره ٢٠ كيلو
من وزن ١٠٥ الى وزن ٨٥
و طولي ١٦٥
و فئة دمي + B
بس ما اهتميت بفئة الدم ولا شكل الجسم
لان كل دراسه ضد الثانيه
في فصيلة الدم ممنوع علي الطماطم و الدجاج ومسموح لي
اللحم الاحمر و القمح
و شكل جسمي كظري
ومسموح لي الطماط والدجاج و ممنوع اللحم والقمح
فالاعتدال فيهم كلهم هو السر
أعيذ نفسي و ديني و أهلي و ما رزقني ربي و خواتيم عملي بالله الواحد الاحد الصمد الذي لم يلد ولم يولد ولم يكن له كفوا احد وبرب الفلق من شر ماخلق ومن شر غاسق اذا وقب ومن شر النفاثات فى العقد ومن شر حاسد اذا حسد وبرب الناس ملك الناس اله الناس من شر الوسواس الخناس الذي يوسوس فى صدور الناس من الجنة والناس
الصيام العكسي معناه اني اسكر فمي تماما
من الساعه ٥ العصر لحد ٥ الفجر ثاني يوم
ومايطب بطني ولا شي تماما ولا حتى اعشاب او شاي
ولا شرايح ليمون ولا ورق نعناع ولا شي بس ماي ساده
بالنسبه للماي اعتمد اني اشرب رشفات فقط
لاني اذا شربت الماي بالكاس كميات كبيره دفعه وحده
تلوع چبدي احس اني شربت اكثر من طاقتي وما اشتهي
اشرب بعدين فعشان اقدر اشرب اكثر من لترين لازم اشرب رشفات
واللي تعاني من وجع بالاجناب و الكلى وهي تتمرن
معناها انها شربت ماي واجد قبل التمرين
ابدأ يومي يوميا اول ما افتح عنوني الفجر
و قبل ما اتحرك من فراشي ب ثلاث ارباع لتر ماء
مضاف له ماء الورد و اما كسرة قرفه او دارسين
و اما شريحة زنجبيل فريش او ورق نعناع فريش
اكون محضرته من الليل ومخليته جنب فراشي مغطى
بعدها اذا خلصت روتيني الصباحي اخذ
ملعقه كبيره من عسل السدر الاصلي و ارش
فوقها ملعقه صغيره من حبة البركه الصحيحه مو المطحونه
و اقرا عليها اذكاري و احطها بفمي دفعه وحده و احركها
بلساني داخل فمي و على اللثه و الخدود و سقف الحلق
و امضغها زين و ابلعها ببطء و اسوي تمريني و افطر بعده
امتنعت عن الكافيين بكل اشكاله
واكتفيت بشاي منزوع الكافيين ( متوفر بالسوبرماركت )
الشاي الاحمر والاخضر والاسود و الابيض كلها فيها كافيين
و تتوفر القهوه بدون كافيين بس ماني من هواة الكوفي
تركت السكر الابيض واستبدلته بالبني و قننت الكميه
تركت الغازيات تماما حتى الدايت و كل المشروبات
اللي تنباع في علبه مهما كان نوعها واكتفيت باللي
اعصره بيدي اذا اشتهيتها
تركت الحلويات و الشبسات والشوكلاتات والتسالي
و اذا اشتهيتها بقوه مره بالاسبوع ٢٠ حبة شبس
او قطعة جلكسي جواهر وحده صغيره و ازيد وراها
ربع ساعه تمرين عشان لا تتراكم
حذفت النشا من وجبه وحده باليوم
و قننت كمية النشا باقي اليوم
اكتفي بكوب رز مطبوخ او حبه وحده
بطاطس مشوي بالفرن او خبزه قد الكف
حذفت المقالي من حياتي و استبدلتها
بالشوي على شبك الفرن و ليس صينية الفرن
لا زلت في صراع بين الخبز الاسمر والابيض
من ناحية الطعم افضل الاسمر بس هذا يعتمد
على توفره بالبيت
تركت الاجبان المعلبه ( تقريبا ) عشان اخفف الملح
الجبن السلايس و السائل و الشدر المعلب
و اذا بغيت اجبان اكل من اللي تنباع بالكيلو
واحرص على انه يكون نوع خفيف الملح و اذا
جبنة فيتا او شلل اغسلها قبل الاكل وانقعها بمويه
تركت المقبلات بكل انواعها من حمص و ورق عنب
وماحب البقيه اصلا لا بابا غنوج ولا غيره
و المخللات و الشطات الجاهزه و المعلبات
اكتفيت بمخلل شغل البيت خفيف الملح و شطه
من البيت خفيفة الملح وبدون زيت و الزيتون
خففت منه واذا باكل منه لازم اغسله اول
ما تركت الزيت تماما لان الجسم يحتاجه للاستفاده
من فيتامينات الخضار و للمحافظه على لمعة شعري
و طراوة بشرتي لكن احاول ماتزيد كميته عن ملعقه
صغيره ليومي كله من زيت الزيتون فقط
صرت استعمل للبيض مقلاة تيفال ممتازه و ما استعمل
ولا نقطة زيت يعني ماعاد تفرق سعراته عن المسلوق
( الجسم لا يمتص فيتامينات الخضار الا عن
طريق ذوبانها في وسط زيتي )
تناول الاعشاب المدره مرتين او ثلاث بالاسبوع
لتر من القرفه او الدارسين او الحبه الحلوه او الشمر
او البقدونس
حافظت على الثلاث وجبات الرئيسيه
انها تكون بنفس الوقت يوميا و احاول
فطوري احاول يكون بروتين بدون نشا
و الغدا فواكه او خضار و لبن او زبادي
و العشا قبل الساعه ٥ من نفس اكل البيت بكميات مدروسه
اضفت لغذائي اليومي بقد قبضة اليد بقدونس
امرر عليه السكين مره وحده عشان لا يكون ورق
كبير ولا صغير تضيع فوائده
واحيانا عدة مرات باليوم خصوصا اذا اكلت تبوله
تعودت على طعمه ويتماشى مع اغلب الاكلات
كل يومين او ثلاثه بضيف لوحده من الوجبات سلطه
جانبيه مكونه من بصله حمرا كبيره و بصله خضرا كامله
و طماطيه و عصرة ليمون و رشة فلفل اسود بدون ملح
و اكلها مباشره و هي فريش و وراها بقد قبضة اليد
بقدونس ورق مو مفروم مع عصرة ليمون بدون ملح
عشان ريحة البصل
اعتمدت على الفلفل الاسود المطحون فريش في كل اكلي
حتى لو افتح علبة زبادي لازم فلفل اسود
الكالسيوم له مصادر غير مشتقات الالبان
موجود بالبيض و المكسرات النيه و الورقيات
الخضرا
اذا اشتهيت الحلا اخذ لي ٣ تمرات فقط و مو من النوع
اللي مكنوز بالدبس و حجمهم متوسط الى صغير
منها استفيد من فوايده الصحيه و منها اشبع رغبة الحلا
و اذا اكلتوها ببطء وخليتوها فتره على اللسان مابتحسون محتاجين
تاكلون اكثر بشرط مايصاحبها اي مشروب لانه بيروح الطعم
و تشتهون حلا اكثر
ماعمري جاملت احد بالعزايم والاكل حتى قبل الدايت
اللي ماحبه يعني ماحبه ومستحيل اكله و اشربه
و حازمه بردي بعد
اذا هو حلا قبل الوجبه الرئيسيه
بتعذر بقول لها اني ان اكلته مابقدر اكل من الوجبه
الرئيسيه ومابيكون حلو شكلي على السفره اقعد وما اكل
او اصلا ما اقعد على السفره وبيكون احراج لها
و اختار من الوجبه الرئيسيه طبق او طبقين بس
اللي مشهوره راعية البيت بتسويته
او طبق ما اعرف اسويه بالبيت
و اذا هو حلا بعد الوجبه
بختار حلا واحد بس المفضل عندي و باكل منه ٣ ملاعق صغيره لا اكثر
انا كملت شهر و اسبوع تقريبا من بديت التزام حقيقي
ما بقول اني التزمت ١٠٠٪ لكن اقدر اقول و
بكل فخر اني قدرت التزم ٩٩.٥٪ وهالشي كان مستحيل سابقا
و لمن اخذت يوم مفتوح بعد شهر تقريبا
انبني ضميري على الكافيين
و يادوب اكلت قطعة حلا صغيره
و اكلت نشا بكل وجبه
و مع اني قفلت فمي ٥ الا ان بطني عورني
بالليل بسبب لخبطة الاكل بالنهار
لاني خلاص تعودت على الالتزام
وباذن الله بعتبر نفسي اكتسبت عادات طيبه لباقي عمري