بس بقي جوعتوني :p:06:

السلام عليكم عروس النيل ماشاء الله
عليكي اعجبتني طريقة صينية البذنجان
بالفراخ لمنال العالم ياتري طعمها حلو
ياريت تخبريني وجزاكم الله خيرا جميعا
الوصفات كلها رائعة استفدت جدا منكم.

غريبة من اول امبارح وماحدش طبخ والا ايه انا باستفيد منكم جدا فينكم اومال
طيب انا امبارح عملت شاورما فراخ بطريقةالاخت دون جزاها الله كل خير بس غيرت فيها شويه
قطعت صدور فراخ صغيرة جدا وجبت طماطم وبصل وتوم وزبادى وسماق وكارى وعلى الخلاط وضربتهم كويس اوى وحطيتهم على الفراخ المتقطعه وسبتهم شويه لانى كنت مستعجلة وبعدين سخنت شوية زيت وعليهم الفراخ وسبتهم لغاية مابدأوا يغلوا حطيت بهارات وسماق تانى وورق لورا مطحون مع حبهان وملح وسبتها لغاية ماشربت مايتها وخلاص وياسلااااااااااام على الريحه والطعم وجنبهابطاطس محمرة
وان شاء الله النهارده هعمل بيتزا واحط عليها بقايا الشاورما وان شاء الله اقولكم بكره على طريقتها

ههههههههههههههههههه
سمعوا كلامي يا أم جميله عشان أنا قولتهم بس بقي جوعتوني

أنا بقي إنهردة إن شاء الله عامله شاورمة لحمة ( بصرة أنا و انتي ) وطبعا سلطة طحينة و عيش فينو ( جاهز ) و صراحة معنديش بطاطس وبس كده
طريقة الشاورمة من أختي حبيتي هبه ((( ربنا يخليهالي يارب )))
بنقطع اللحمة ( بنغسلها كويس ونصفيها ) والبصل و الطماطم و الفلفل الرومي شرائح طويلة و رفيعه
وبعدين بنحطهم كلهم في صينية ونضيف عليهم كوب زبادي والتوابل بتاعتك ( بس ملح لأ ) وخل ولو عايز ممكن تضيفي نص ليمونه وتقلبي كويس
لو عندك وقت تسيبيها في التلاجة ليله لو مش عندك خلاص
ونحطها علي البوتجاز ونقلب باستمرار بمعلقة خشب وقرب ما تستوي نضيف الملح وبعد كده نص كمية البقدونس اللي مقطعه
و النص التاني لما تطفي عليها
صراحة أنا بحب أعملها لإن مافيهاش لا زيت ولاسمن
و نأكلها بألف هنا وشفا وجنبها سلطة طحينة الله أنا جوعت برضه :hahaha:

شوربه سى فود
نص كيلو كابوريا سلقتها وسبتها على جمب
كيلو سمك لوت متقطع ويفضل انك تخليه من العظم ونص كيلو جمبرى وربع كيلو سيبيا تقطع شرايح ويتم غسلهم كويس عشان الزفاره تروح ونحطهم فى مصفاه
نقطع بصلتين اربعه وعليهم ملح فلفل كمون وكارى وندعك كويس البصل مع السمك والجمبرى والسيبيا وعلى النار شويه زيت ونضع فيه مستكه وحبهان ونحط السيبيا والجمبرى والسمك يتشوحو وعلشان السمك بيستوى قبل الحاجات التانيه ممكن نشيله بالراحه بالملعقه ونحط ميه بعد ما السيبيا والجمبرى اتشوحو شويه وبعدين نحط السمك مره اخرى لحد ما يستوى نجيب الكابوريا نشيل الجزء الخلفى الى مش بيتاكل ونرميه وننضفها ونفتحها نشيل الغطا بتاعها مش عايزينه ثم نقطعها اتنين زى لما بنجى ناكلها ونشيل الزعانف نرميها ونحط منها فى الشوربه تغلى غلوه مع باقى السى فود ونقطع القراصات ونحطها برده فى الشوربه ونطفى عليها وعشان لون الشوربه الابيض الى بنشوفها فى المطاعم نحط فيها شويه لبن ودا من اختراعى وعند التقديم تقدم فى طبق غويط للشوربه نخلى الكابوريا تخرج من الطبق ومعاها رشه بقدونس على الوش وهنيئا مريئا
نقدم معاها رز بنى وانتو عارفين طريقته بصله صياديه وشويه جمبرى عشان الطعم ونحط الميه تغلى وبعدين الرز ولما يخلص نقدمه فى مطبقيه الشوربه نبططه ونقلبه فى طبق مسطح وعلى الوش شرايح سبيا جمبرى شوحته مع بصله الرز فاخد لون بنى وطلعته وزوقت بيه الرز وحمرت بطاطس بشرتها بالمبشره صغنونه وقلتها ورشتها على الوش مع الجمبرى والسبيا

والسلاطه بنجر مسلوق ومتقطع وعليه وليمون سلطه جزر مسلوق متقطع عليه شبت متقطع وزيت زيتون وملح وفلفل
واى سؤال او حاجه مش واضحه انا جاهزه
هنيئا مريئا