بسم الله الرحمن الرحيم .
إلى خواتي العزيزات كيف حالكم إن شاء الله تكونوا جميعا بخير
حبيت أكتب لكم أخباري لأني مقصرة بحقكم . بس بالأول لازم تعرفون ليش صارلي فترة مو كاتبة شي . أولا بعد ما وديت الخادمة طبعا شي طبيعي المسؤولية تكثر عن الأول غير أبو العيال وطلباته اللي ما تخلص ودراسة البنات ومجابلتهم هذا شي ثاني . والله من انشغالي أحس مقصرة بنفسي حتى . وصدقوني حتى صديقاتي مو قاعدة أكلمهم مثل أول لأن ما عندي وقت والكل قاعد يلومني على هالشي إني قاعدة أشتغل زيادة عن اللزوم والسبب ما أبي أحد يقولي والله قصرت بشي وما حب أأجل عمل اليوم للغد لأن أنا الحين بروحي وما في أحد يساعدني وعلشان لا تكثر علي الأعمال . بس أحيانا يكون في عندي وقت بسيط جدا ممكن أريح فيه أو أسوي شي حق نفسي . ما أدري شنو أقلكم . أول ما راحت الخادمة كنت مستانسة وحتى زوجي كان مستانس لأنه حس بالخصوصية مو مثل أول شنة أحد يراقبه وكنا فعلا مستانسين وأشتغل براحة وعلى كيفي وحتى المعاملة مع زوجي تغيرت وتحسنت عن الأول حتى بعض الأحيان حسيت شني متزوجة جديد تصدقون كنا نطلع مع بعض وايد حتى الصبح نودي البنات للمدرسة واحنا نروح أي مكان بروحنا وزوجي كان يقول لأخي والله ما شاء الله عليها متحسنة عن الأول السبب كنت أقول خلني أسوي اللي يبيه ليش أجادلة ونتهاوش وبالآخر راح يصير اللي هو يبيه وفعلا طبقت هالشي ونجحت بس ما أدري قبل تقريبا شهرين أو ثلاثة ما أدري شنة مل أو زهق والله ما أدري ولا العيب فيني والله ما أدري شي تافه يصير ويكبر ونتزاعل ووصلت لمرتين بغينا ننفصل والله ما أدري شنو أقولكم أخاف العيب فيني وأنا ما أدري . صحيح أنا عندي أخطاء أو حتى أقول شي عن عبط بس بدون قصد وهو بدوره يكبرها ويصير الزعل بعد شنو يحلني منه . عندكم آخر مرة مثلا ( ما يخالف طولوا بالكم ) .
كان عند زوجي صديقه على الغدا وظل لليل ما أدري شنو طرى ببال زوجي يروح يفتح الثلاجة ويشيل كل اللي فيها وعينكم ما تشوف إلا النور . اللي خربان واللي صارله فترة تدرون شنو سوى شان يروح وييب الكاميرة ويصور قالي هذا اثبات إذا أحد لامني عندي دليل وشان ينادي البنات ويشهدهم ويقولهم إذا صار شي بيني وبين أمكم لازم تعرفوا السبب . تصوروا .....بس أنا ما عصبت ما أخبي عليكم قلبي يرجف بس حاولت أحول هالشي للضحك نوعا ما قلت له ما يخالف سوي اللي تبيه أصلا أحسن على الأقل نظفتلي الثلاجة لأن ما كان عندي وقت مع إني والله العظيم والله يشهد كنت على طول أنظفها بس حظي الحلو ...........
شان يقولي لا تلفي ودوري مافي داعي لهالشغلات قلت لأ ما يخالف أنا أبي شذي علشان ما أعيدها بهالطريقة شوي مصيت غضبة مو وايد بس أحسن من الأول .
وبعديها بكم يوم يصير عدة شغلات ما أذكرها بالضبط الحين ونتزاعل ونرجع مع بعض . ومن قبل أسبوع تقريبا قعدني من النوم الصبح كان يوم عطلة ما أدري شنو اللي تذكر والدي إنه اشلون يوصي إنه يندفن في بلده مو اهني شنو هالتخلف ومن هالكلام على فكرة صارله فترة يتكلم عنه ما أدري ليش فجأة صار يكرهه ويتكلم بشغلات ما إلها داعي مو الرجال ميت والله بط شبدي بهاليوم زودها وأنا انفجرت منه وما سكت كالعادة قلت كيفه يا أخي ييدفن وين ما يبي إنت ليش مدايق وليش تتكلم عنه ما تشوف أبوك قالكم إذا مات ما يبي يندفن اهني ليش تتذكر والدي وما تتكلم عن أبوك طبعا ليش أقول شذي شان يزعل وقالي ليش أنا موافق مو تهاوشت وياه قلت أنا قصدي هم هو فكر بنفس الطريقة فماكو داعي لهالكلام كل واحد حر بنفسه .صح كلامي ولا لأ .طبعا زعل وايد وما تكلمنا مع بعض خمسة أيام تقريبا وطبعا حاولت أصالحة بس ماكو فايدة منه.ومن قبل يومين تقريبا صرنا نتكلم بشغلات وايد قبل ما نتصالح عدل عن كل شي طبعا صار يتكلم عن أيام الفراعنة ( تعرفون قصدي ) يعني الحمد لله تفاهمنا على شغلات وايد حتى هو قالي سأل دكاترة نفسانيين وقالوله شنو تبي منها طلقها أو إنك تسافر أو تطلع من الصبح ما ترجع إلا وقت النوم .( خوش طبيب ) خراب بيوت . هذا إذا سأل أحد .!
عورت راسكم بس اعذروني لقيت عندي وقت أراسلكم . ترى أحبكم وايد وودي أشوفك صج يوم من الأيام إن شاء الله . والحين سلام حبايبي

حياتي زوجك من النوع المتسلط هو هيك و حيفضل على طول لا تحلمي ان يتغير و ما لك سوى التعايش مع هذا الواقع المرير

الله يعينك ياختي على هذا الزوج ويارب يصلح مابينكم ويسخرة لك غصب عليه يارب العالمين وانا اكتب الرد اذان المغرب ياذان بدعيك

السلام عليكم إلى الأخت هيملاج الله يعطيكي العافية أحيانا أحس نفس ما قلتي وما عندي غير هالحل بس إن شاء الله يغير من نفسيته وربنا قادر على كل شي لأني لم أشوف أبوه اشلون كان بشبابه متسلط ومافي أحد يقدر عليه الحين الله كافينا مريض بالسرطان وملتهي بنفسه ومافي أحد بالبيت أشوفه حنون عليه وزوجته هي اللي ماسكة كل شي بالبيت يعني ربنا يمهل ولا يهمل سبحانه.
إلى الأخت دمعة غلاء مشكورة حبيبتي على ردك السريع وربنا يتقبل منك صلاتك يارب بترجاكي تدعيلي بصلاتك ومشكورة حبيبتي .الواحد منا لازم ما يفقد الصبر وربنا قادر على كل شي .

بصراحه ما أدري أيش أقولك بس توني أشوف مشكلتك و ما أمداني أشوف كل الردود بس بصراحه سالفه الثلاجه و سالفه ابوك وين أندفن خلتني أفكر ان زوجك غير سوي نفسيا او عقليا