تعبت من نظرتهم لي لي متى يشوفوني أقل منهم

مشكلتي مع بيت جدي ( خالاتي وبنات خالاتي )
ابوي راتبه على قده يااادوب مكفينا وحنا في البيت 7 مشاالله
يعني وضعنا أقل من عااادي بشوي
طول عمري محرومه من طلعات وخرجات ولبس وحفلات
بس كنت أقول الحمدلله لأن ابوي ماقصر علينا راتبه كله لنا الله يطول بعمره
ووضعنا خلى علاقتي مع خالاتي وبناتهم صفر
ماعمري رحت لهم عزيمه او حفله أو طلعنا معهم
ماعمر كلامي معهم تعدى السلام عليكم
يادوب أشوفهم بجمعتنا الأسبوعيه ومو دايم أروح وأكون بعباتي

وألحين الحمدلله ربي رزقني بزوج مقتدر
ومايقصر علي بشي
الحمدلله مشاالله
بس هالشي ماعجب بنات خالاتي
أولا ماتقبلو أني أتزوج قبلهم
أصلن خبر خطوبتي كانت فاجعه لهم والله لدرجه وحده منهم صاحت قدامي ليه أعرست قبلها
والشي الثاني موتقبلين أني ألبس وأكشخ
لو يشفون عندي حاجه ماركه يقولون لي هذي تقليد وهي أصليه
وان قلت لهم انها موب تقليد يتريقون علي ويكذبوني واني حديثة نعمه وموشايفه خير
والله ماقصدي اشتري ماركات عشان اغيضهم
يعني مره في حفلة ملكه كنت لابسه بدله عااديه جدا بس كنت حاطه ورده جنب اذني ( كانت موضه )
كل شوي وحده منهم ناطه لي من معلمك هالحركه والله فاض بي ورحت الحمام اصييييح
ليه مستهنين فيني
والله تعبت من نظرتهم
أحيانا اكذب وأقول الشي اللي علي او على بنتي تقليد او بسعر رخيص بس عشان اسلم من حكيهم ولايحرجوني قدام الناس
مره جدتي اعطتني فلوس قالت لي اشتري لك فيها حاجه ورفضت اخذها بس حلفت علي ولزمت
وبعدها بكم يوم كان فيه مناسبه اضطريت اعتذر لاني كانت كل شوي بتنط لي وحده تقول اللبس اللي عليك من فلوس جدتي مع اني مجهزه للمناسبه من قبلها والفلوس اللي اعطتنياها اعطيتها لأمي

يابنات لاتفكرون اني همي المظاهر او الماركات
بس والله تعبت من نظرتهم
أقل شي يحترمون مشاعري
نفسي اعرف اسكتهم للأبد