[رابطة] أصحاب العمليات الجراحية للتنحيف

هلا اخواتي ممكن اشترك معاكم
انا عملت حزام المعده من اربع سنوات ونزلت وقتها كثير بس المشكله لما تزوجت وسعت المعده وحملت وولدت الحين افكر انه ارجع اصغرها تتوقعو فيه فايده ولا لا

مس فيفا ..

كابوس التمدد زي مابتسميه مش بيحصل في يوم وليلة متخافيش .. ده هيلازمك طول مالحزام على معدتك بس :)

بيحصل لما تاكلي كتير اوي وترجعي وتاكلي وترجعي .. كل مرة بتاكلي فيها كتير معدتك بتنمط شويه بشويه زي البالون .. طبعا مع تكرار عمليات المط دي وانها تبقى هي القاعد يعني لما تبقى دائما معدتك مليانه وباكل كتير كمان هتبقى دائما ممطوطه وبالتالي هتتوسع شيء فشيء .. اذا زاد التوسع ده عن الحد وحصل في مده قصيره يعني مش توسعت على مدار السنين لاه على مدار شهور مثلا في الحاله دي لاقدر الله جدارها بيكون رقيق جدا وبالتالي لاقدرا لله ممكن تتعرض للانفجار ..

يعني ياستي متخافيش ابدا مش الاكل الصلب في المرحلة دي هو الي هيوسعها لكن للاسف هو ممكن يحرك الحزام من مكانه او يلهب المعده فترجعي كتير او او او .. بالعربي يعني يخرب لك عمليتك الي طلعت عينك على ماعملتيها ..

فانتي باذن الله الاسبوعين الجايين التزمي بالمهروس فقط من جهة تحافظي على العملية ومن جهة ثانية تنزلي وزنك اكبر قدر ممكن لان شهر السوائل ده هو الشهر الذهبي لنزول الوزن ..

متقوليش ابدا انا طلعت فاشلة .. الفشل في انقاص الوزن اختيار مش اجبار .. يعني محدش بيضربك عشان تاكلي ولا حد بيشدك من شعرك عشان تحددي نوعيات الاكل الي بتطخن اكتر من غيرها وتخليها هي وجباتك المعتاده ..

لو حطيتي في بالك انك فشلتي خلاص هتستسلمي وينتهي الامر .. قولي في ذهنك انا قويه واستحق حياه افضل .. هوصلها بقوتي واثبت للكل الي انا حاسه بيه وهم مش راضيين يصدقوه .. كرريها بينك وبين نفسك دائما وابدا وكل ماتشوفي لقمه عجباكي اعمليها تحدي هي ولا نظرة الناس .. هي ولا هدفي الكبير الي لازم اوصله باي ثمن ؟

بالنسبة للاكل الي بتحبيه والي مبتحبيهوش ..

عن نفسي كنت بكره الفول كره شديد جدا ( ربنا يسامحني ) يعني مستحيل آكله .. استغليت الحكايه دي في اني اعرف اذا كنت جعانة بجد ولا عاوزه اكل طفاسه او شفاحه زي مابتسموها .. الحل ببساطه افكر في الفول .. لو لقيت نفسي مشتهية الفول وعندي استعداد اكله ففي الحاله دي بعرف اني جوعانه فعلا وادور على اكل وآكل .. لكن لو لقيت نفسي قرفانه منه كما العاده ومقدرش آكله او افكر اني اكله يبقى في الحاله دي انا شبعانه بس بستهبل ..

فانتي بالنسبة لك نفس الشيء .. بتقولي بتكرهي الشوربة والسلطه .. فاعمليهم مقياس .. حضري الشوربة الي هتتغدي بيها لو ملقيتيش لك نفس في اكلها خلاص حطيها على جنب واعرفي انك شبعانه . . بعد فترة ولما تجوعي بجد هتلاقي نفسك تلقائيا مشتهية الشوربة الي لسه من شويه كنتي عفتيها وهتلاقي انها لذيذة جدا ومشبعة جدا بالنسبة لك ..

الميزه اننا ناكل اكل مش لذيذ او مبنحبوش اوي اننا بناكل كميات اصغر .. وبالتالي ننحف اكتر ..

دي القاعده العامه وهي انك متاكليش غير لما يبقى لك نفس في الاكل الي مبتحبيهوش لكن ده لاينفي ان الواحد احيانا بتيجي له اوقات او ايام بيكون نهم جدا في تناول الطعام وبياكل لمجرد الاكل .. عن نفسي مريت بالايام دي كتير جدا جدا .. احيانا بقعد اكل واكل وسبحان الله احيانا باكل كتير جدا ومرجعش مع ان في ايام تانيه ممكن اكل لقمتين وارجع بس هي فتحة النفس بتيجي فجأه .. مفيش مشكلة لو مريتي بيوم من الايام دي استجيبي له وكلي زي ماانتي عاوزه بشرط .. انك تكوني منظمه نفسك .. يعني مثلا انا كنت بعمل يوم في الاسبوع اكل فيه الي نفسي فيه .. مش يوم ثابت بس كنت بلتزم برجيم او نظام غذائي فيه محرمات وامشي عليه كذا يوم وبعدين لو حسيت نفسي في يوم مفتوحه اوي افكر كده اشوف بقالي كام يوم ملتزمه لو لقيت ان لي مثلا اربع خمس ايام ماشيه على الرجيم خلاص بفك نفسي شويه مش مشكلة بس لازم ارجع الايام القادمه التزم وهكذا ..

الحكايه مش صعبه ابدا.. هي بالنسبة لك دلوقت ممكن فيها شيء من الصعوبة لانك شفتي شر العملية ولسه مشفتيش منها خير .. لكن مع الايام والشهور باذن الله هيبدأ مجهودك يؤتي ثماره ولما نزول وزنك يدخل في الجد وتبدأ حياتك تتغير من جذورها وقتها هتبقى القاعده عندك هي الرجيم وماسواه هو الاستثناء .. ومتنسيش انتي لسه مضوقتيش لغايه دلوقت يعني الامل قدامك لسه عريض ومفتوح فمتخليش الوضع الحالي يحبطك ابدا ..

انتي تعتبري لسه معملتيش العملية لانك لسه مضوقيش لكن التزامك في الفترة دي بعدم الاكل هو الاختبار الحقيقي ليك وهو الي هيخليكي تقدري تكملي في الشهور الجايه .. هو ده عنق الزجاجه زي مابيقولوا ..

وكويس اهو رمضان جاي باذن الله قريب هتبقي صايمه طول النهار وباذن الله حاولي تشغلي نفسك طول الليل يعني متفوتيش التراويح ابدا وياريت في المسجد وخلي لك ورد ثابت من القرآن تقريه كل يوم كل الحاجات دي هتضيع منك وقت كتير مش هتخلي الوقت المتبقي من اليوم يكفي لاكل زي زمان وبالتالي باذن الله يهنزل وزنك كويس في الفترة دي المهم انك تحاولي قدر الامكان متطبخيش اكلات خاصه برمضان خاصه المقلي منها ..


وبمناسبة المقليات ياجماعة ياريت نشطبها من قاموسنا خالص .. تمنع منعا باتا ونهائيا ولا حتى قضمة منها .. بيقولوا الحكايه دي بتخسس اوي .. هجرب باذن الله واقولكم ..

مس فيفا كم كيلو نزلتي باول اسبوع

بنات بليز جاوبوني هل للعملية علاقة بتأخير الدورة

ايوه احيانا بيكون لها علاقة ..

النزول المفاجيء في الوزن بالظبط زي الزياده المفرطة فيه بتعمل لخبطة هرمونات وبالتالي قد تؤثر على انتظام الدورة ..


لو العملية هي السبب في الحكايه دي بالنسبة لك متخافيش لان ده وضع مؤقت هتتلخبط شهر ولا شهرين بعدين تنتظم من نفسها بعد ماجسمك يعتاد التغيرات الجديده في الوزن ..