شوفوا قصتي أنعزمت على خطوبة زوجي

يا قلبي حزنتيني

الله يشفيك

اصلا الرجال ماوراهم الا الهم و المرض حسبي الله

لا اله الا الله

قصتك فضيعه

الله يصبر قلبك ويشفيك يارب

وخلاص اللي صار مقدر ومكتوب انسيه واكسبي صحتك وشبابك

واكثري من قول

اللهم اجرني في مصيبتي واخلف لي خيرا منها

يالله
كان الله بعونك وشفاك الله

الله يعينك موقف صعب جدااااااااااااا.............
حبيبتي حاولي تنسين ولا تفكرين.....صحتك ثم صحتك......

فعلا رجال مايحبون الا نفسهم........

هلا بنات

مشكورات على الدعوات الحلوه عسى الله لا يحرمنا من بعض

في بعض النقاط ابي اوضحها لكم واجابات لبعض اسئلة البنات

اول شي اذا وحده تقدم لها شخص متزوج لازم تشترط ان زوجته الاولى تكون عارفه طبعا التعدد شرع ومالنا اي اعتراض عليه بس تشترط لا يصير لها زي قصه وحده هنا كتبتها انه اهملها وصار مايسال عليها او يصير لها زي الي خطبها زوجي

انا مالومها اي وحده في سنها ودها تتزوج ومستحيل يتقدم لها واحد عزابي وهي تبي الستر دعيت لها من كل قلبي ربي يرزقها واحد أحسن من زوجي هي كانت رافضه يوم درت انه متزوج وكانت تقول ما ابي ابني سعادتي على تعاسة غيري بس اخوانها من ابوها غصبوها وقالوا لها اجل احلمي ان يجيكي واحد مو متزوج وانتي شوي وراح تصكين الاربعين

ترى حتى هي كان موقفها ما تنحسد عليه خصوصا قدام جماعتها حتى امها من ثاني يوم اتصلت على امي تعتذر وهم اصلا مالهم اي ذنب وكل شوي كانوا يتصلون يطمنون علي

ورغم الي صار لي بس يشهد الله اني ما دعيت عليه تدرون ليه لان عندي بنت متعلقه مره في ابوها وهو صراحه في عياله متعلق
ما اتخيل انها تفقد ابوها في سن بدري مهما جاء او راح هذا ابوها ولا في احد يحل محل الاب

الاخت الي قالت انتي طلعتي من البيت وراح يدور على الحلال انا ما طلعت من بيتي
اصلا من تقدم عند الناس الى فترة الخطوبه كانت شهر يعني تقدم عندهم قبل ما احمل وانا اذا حملت المويه حتى ما اقدر اشربها في بيتي على طول ارجعها وانتوا بكرامه فما بالكم بالاكل ورغم كذا كنت رايحه يومين عند اهلي اريح لاني في بيتي اتغدى في السطوح في عز الظهر على شان ما ارجع اكلي

طيلة هالشهر الي كان متقدم فيه كنت حاسه ان فيه شي بس ما جاء على بالي خطوبه اشوف شكله متغير بس كان يقولي مزنوق اذا طلبت منه شي هو طبعا يجمع للعرس وانا كنت افكر انه مديون وعلى شان كذا هو متغير شكيت في كل شي الا انه يكون بيخطب
الغريبه كان قبل الخطوبه رومنسي بزياده يعني زوجي من النوع العادي الي ماهو حق غزل او النوع الرومنسي يعني عادي بس ذيك الفتره كان دايم يقول لي والله لو اتزوج عشر ماراح احصل وحده زيك في وقفتها معي والله ماراح احصل وحده في جمالك واخلاقك

كنت مستغربه وش هالكلام الي نازل عليه فجاه كنت اقول لا يكون اكتشف ان عنده مرض خطير والرجال بيودع ولا يبي يعلمني

الان الاوضاع بينا عاديه يعني بالعكس اشوفه مهتم فيني بالمره بس الشغله مني انا يعني مشاعري مو زي اول يعني اول كنت مهتمه اخاف انه يزعل او يضايق مني الان اقول بكيفه يزعل بطقاق ما صرت زي اول كنت ما ابي ارجع له ابد بس الي رجعني بنتي وولدي وانا عند اهلي سمعتها تحت البطانيه تبكي يوم سالتها قاالت لي كنت احسب نفسي بعيش حياه سعيده بس حياتي صارت فضيعه ليه بنات خالتي يجي ابوهم ياخذهم واحنا طول الوقت عند اخوالي تخيليوا بنت عمرها خمس سنوات تقول هالكلام والله بغيت اشد شعري يوم قالت نفسي اموت وارتاح

حتى نفسيتي مع الناس تغيرت كنت اول احب المزح والتريكه الان طول الوقت ساكته

باقي شغله بغيت انبهكم عليها يابنات اذا دعيتوا لشي تبونه لا تعلقون الدعاء

يعني وحده من صديقاتي ساكنه عند اهل زوجها كانت تدعي انها تروح بيت لحالها باي طريقه المهم تطلع من عندهم وطلعت من عندهم بس بعد وشو بعد ما تزوج زوجها طق لكل وحده منهم بيت

أنا كذا زوجي دايم على لسانه بتزوج من يوم ما خذيته يعني زي باقي الرجال لا جاء يبي يغث قال بتزوج مرات كنت ازعل وبعدين صرت اطنش ويوم رحت احج دعيت ان ربي يشيل هاكلمه من لسانه باي طريقه وفعلا بس بعد وشو صار ما يقولها الان يخاف ازعل ويتاثر سكري

الله يوفقكم ويسعدكم ادعولي بس انسى ولا عاد اتذكر واعيش حياتي طبيعيه زي اول قبل اسبوع كانت ذكرى زواجي حاجز ليله في فندق ومطعم فخم اول مره يسويها بغيت استانس وافرح بس اتذكر العام كنت انا مسويه الحفله وهو راح يخطب

خربت الليله عليه وعلى نفسي ابي امثل اني عاديه بس ما قدرت

دعواتكم لي ابي انسى والله خلاص هنا عاد جاني البكى

الله يسعد كل وحده فيكم يارب