حكاية معلمة (والدي يرفض تزويجي بسبب الراتب)

هلا بك اختي شاكره مرورك ومشاركتك لي بمشكلتي لكن ما اقول غير صبر جميل وبالله المستعان

هلا بك اختي

يالغاليه لو تدرين ان ابوي امام مسجد ودايم يجون بالمسجد شيوخ افاضل يلقون محاضرات وخاصة مواضيع الزواج لا والمصيبه الكبيره ان ابوي دايم يتدخل في مشاكل اصلاح ذات البين خاصة اذا كانت المشكله بين رجال وحرمته تلاقينه اول المتدخلين بمثل هالمشاكل والا المصيبه الاكبر اذا راح شاب عند ناس وخطب بنتهم ورفضوه لأي سبب من الاسباب على طول يفزع للشاب عند اهل البنت ويتدخل بالامر ويحاول يقنعهم بالموافقه واتمام الزواج ويسمعهم محاضره طويله عريضه ان البنت مالها الا الزواج وانه ستر لها بهالزمن يعني هذه الاشياء عنده من الاولويات وتنطبق على كل الناس وعلى كل البنات بالدنيا الا علي انا ليش مدري انا هذا اللي مجنني وحاط عقلي بكفي يعني مايحتاج يسمع محاضرات هي الفلوس اللي صاكه على تفكيره وما اقول غير صبر جميل وبالله المستعان وشاكره مرورك الكريم

السلام عليكم ورحمة الله وبركاته

اولا وقبل كل شي احب اشكر كل البنات اللي شاركوني بارائهم ونصايحهم وتفاعلوا مع مشكلتي والله العظيم حسيت اني اكلم اخواتي في الله الله يخليكم لي ولا يحرمكم اجر التناصح في الله


ثانيا انا اشوف ان فيه بنات الله يجزاهم كل خير كانوا متابعين القصه من اولها ومازالوا متابعين فديت طيبة قلوبهم وفيه بنات تو داخلين بالموضوع وماقصروا جزاهم الله خير على كل حال حياكم جميعا اللي من اول واللي تو حبيت استشريكم بشي ضروري جدا جدا ومسأله جديده طرأت على السالفه وأبي منكم المشورة وماخاب من استشار اسمعوني يالغاليات السالفه وما فيها:



قبل يومين بالتمام جت خالتي تزورنا وامي ماكانت بالبيت كانت عند الجيران قلت لها تبيني انادي امي قالتلي لا يا بنيتي قعدي شوي ابسولف معك وانتي بعدين علميها بالهرج قلت لها امري تفضلي قالت لي شوفي وانا خالتك هذا ابوك مو بصاحي وعقله مو معه هو صح يحب الفلوس من يومن ربي خلقه لكن مو لدرجة انه يمنعك من سنة الحياة ومن الستر ولازمن نشوفله دباره قلتلها وشو ياخاله قولي افزعي علي قالت خذي هالبخور وبخري بالبيت واذا دخل ابوك البيت وقال اوف وش ذا البخور اللي ريحته تصرع هذا دليل انه مسحور المهم شلت البخور منها وفتحت العلبه والا هو بخور عادي مثل المعمول الدوسري وريحته تجنن ماشاء الله قلت لها ياخاله ريحته حلوة بالحيل قالت هذا ليش انك مافيك شي لكن هو بيبين معه انتي بخري واقعدي له بالصاله اول ما تسمعين دخلته مع الباب افتحي اذانك زين وسمعي وش يقول وبلغيني بسرعه دقي علي وعلميني عاد انا قلت لها حاضر وطلعت خالتي ويومن امي رجعت البيت علمتها ودقت على خالتي واستفسرت منها وامي موافقه وتقلي توكلنا على الله خلي نبخر بالبيت ونشوف وش يقول ابوك يعجبه البخور والا يتضايق من ريحته



يابنات انا مو داخله عقلي حكاية البخور لكن بيني وبينكم السحر حق ومذكور بالقرآن يمكن ابوي مسحور على انه ما يزوجني ابي رايكم بالموضوع ياترى تأيدون اني ابخر بالبيت واشوف ردة فعل ابوي من ريحة البخور والا ما تأيدون ؟؟؟؟؟وهل تعتقدون اني اذا بخرت وابوي شم ريحة البخور يبي يتضايق ويعصب والا عادي ما بيحس بشي ؟؟؟



لاحول ولا قوة الا بالله

هلا بك يالغاليه فديتك وفديت متابعتك ايه والله هذا اللي انا محتاجته منكم ابيكم تكونون معاي وما تتركوني لاني بضيق ما يعلمه الا الله سبحانه وتعالى ولاحول ولا قوة الا بالله