حبيبتي انا فاهمتك وعارفه بالضبط اللي تحسين فيه
لاني مثلك بالضبط لي سنتين متزوجه وماكتب لي ربي
ذريه ..
حالتك اللي تتكلمين عنها انك تبكين ولا تقدرين توقفين دموعك
وطول الوقت خانقتك العبره هاذي جتني لما سويت الانابيب
قبل كم من شهر ولا نجحت ..
يالله قد ايش كانت هاذيك الايام صعبه من قلب !!
كنت وين ما اروح ووين ما اجي العبره خانقتني ودمعتي تنزل غصب عني
خفت ان ربي مايحبني وعشان كذا مارزقني خفت اني ظالمه احد ولا ماكله حق احد
ما اكذب اذا قلت جتني حالة اكتئاب وكنت طول الوقت سرحانه وشارده وانسدت نفسي عن
كل شي عن الاكل والسوالف والطلعات والدنيا كلها !!
لكن فجاه صحيت من اللي أنا فيه وحسيت كأن احد صفقني كف وقعدت أسأل نفسي أنا وش سويت في عمري
وين الرضا بالقضاء والقدر وين ايمان المؤمن وين الثقه بالله وين الدعاء والاستغفار والقرآن !!!!
وبديت استغفر في كل وقت ورجعت لربي وكانت دعوتي في صلاتي ان ربي ينزل علي السكينه والطمأنينه
ويرضيني باللي كتب لي ويمنحني قوه وصبر .. وعرفت أن ربي يحبني وعشان كذا يبتليني وأنا قد هالابتلاء
ان شاء الله وباصبر لحد مايرزقني ربي ولا راح أيأس ولا أتحطم أو أسيء الظن بربي ..
ربي ارحم بنا من أنفسنا ومن أمهاتنا اللي ولدونا ومن كل من يحبك
خلي ثقتك بالله قويه واملك بالله كبير وادعي بكل وقت وكل حين
وخلي ذكر الله دايم على لسانك وخلك قويه بوجه هالدنيا لان الضعف ماينفع
ووضحي للناس أن الموضوع ماهمك لانه مو بيدك واذا ربي كتب بيرزقك بالوقت
اللي مكتوب لك من أزل الدنيا ..
وشوفي الناس اللي أقل منك واحمدي ربك عندك فلوس وصحه وعافيه وحياة مستقره
وأهل يحبونك وتحبينهم ..
ترا العيال موب كل شي ياما ناس عندهم عيال ومشاكلهم الكل يحكي فيها
ولا عيالهم عاقين وجايبين لهم الهم في دنياهم .. الواحد مايدري وين خيرة ربي فيه ياعمري
الله يرزقك ويرحم ضعفك ويقويك ويصبرك وينزل عليك طمأنينه وسكينه من عنده
الله يملأ قلبك سعاده ورضا ويعطيك في جسمك الصحه والعافيه ويرزقك حتى يرضيك
عاجلا غير آجل وكل مشتهيه يارب
طولت عليك لكن لاني حاسه فيك وعارفه شعورك واتمنى انك تقرين كلامي بتمعن وتفهمينه
لاني اقوله من قلب والله ..
دعواتي لك
ليه اش ذنبي ليه الناس تطالعني بنظرات الشفقة(حرام والله حرام) تعبت خلاااااص
متابعة النقاش، صفحة 32