اسفه على التأخير .. العوده للوطن

الله يعين يا الهندية شاليه هم اذا رجعت و ازيدك من الشعر بيت قريت المقال هذا و زاد الطين بلة بس مثل ما يقولون تفائلوا بالخير تجدوه
http://s1.alriyadh.com/2006/03/27/article141451.html

هلا و الله و مرحبا بكل الي شاركو و الي ما شاركو
roro
حياك الله اختي و مشكوره على مرورك
ام محمد
هلا فيك و الله .. اما عن الكي بورد العربي .. فا انا ناقله الجهاز الي كان عندي في امريكا و الكي بورد الي فيها الحروف العربيه كانت تمشي الحال فا صرفناها و احنا هناك و علشان نشتري ثانيه .. لازم تضم لقائمة الخمس مشاوير !
ست الحسن .
مشكوره اختي على مرورك .. و فعلا صادقه
رانيا
هلا فيك ترى مو الكل منزعج فلا يضيق صدرك يمكن فيه ناس مرتاحين و ما لاحظو الي لاحظته .. كل شخص له اهتمامات يعني فيه ناس كثير بامريكا ما يعرفون لغه فا هي معتمده على زوجها انه يوديها هي و عيالها لكل شي .. فا ما راح تستنكر .. يعني كل شخص مختلف عن الثاني .. انا بس حبيت اقولكم الاشياء الي انا ضايقتني .. علشان يالي متغربين لا تحسبون الرجوع للوطن شي جدا رائع و ما فيه سلبيات ..
saudi girl
اما عن المدرسه .. اااه بس نفس المعاناة ..
اما السواق فا هذا قصه ثانيه .. انا مفكره و كنت اقول لزوجي اقعد بلا شغاله و لا اقعد بلا سواق .. لكن وين احط السواق .. من زين البيوت الي هنا .. ما دامك ما عمرتي لك بيت مثل ما تبين .. انسي الاحلام الورديه .. اما من ناحيه الاباء مشغولين .. تصدقين قبل فتره كنت بمستشفى ازور شخص .. و الغريبه ان كل الي يجيبون عيالهم و الي نايمين عند عيالهم حريم .. حتى الزوار حريم .. ما تشوفين رجال .. حتى زوجي قال .. و ين ابائهم ذولا .. قلت له لاهين بالاستراحات !!!
سكر يا احلى سكر ..
كيفيك .. و كيف الصغار .. مشكوره على مرورك .. و فعلا الله يعين بس
Dowain
انا كنت مثلك شايله هم بس التطبيق غيييييير

اااااااااه يا لهنديه والله جيتي على الجرح للاسف اقولها بكل صراحه يا ريييييت السنيين اللي عشتها في امريكا ترجع كنا في حال والحين في حال اخر يييييووه انا في هالموضوع لو اكتب عشر صفحات مااخلص الله يعينك ياختي ويصبرنا على هالاوضاع

الظاهر من العنوان .. عرفتو ايش بقول .. ياناس الشوارع ,,, جنون .. لازم تتشهدين اذا ركبتي السياره .. اللهم يا كافي الناس كأنهم في سباق .. طايرين و طبعا ما فيه احترام ابدا .. يعني كم مره نكون واقفين عند الاشاره .. في امان الله .. الا تجييك ذيييك السياره الي لاصقه .. فينا .. من جنب علشان يبي يسقط علينا اذا فتحت الاشاره !!! لاصق بسيارتنا بشكل غير طبيعي يمكن لو افتح الشباك و امد يدي مسكت شماغه .. ؟؟؟ كأنه اذا وقف ورانا تعطلت كل اشغاله !! طبعا هذا غير الناس الي يوقفون في اقصى اليمين و يبون يلفون لاقصى اليسار ... عاااااادي من حقهم كل واحد يقول ايه الكل يسوي كذا و انا لو ما سويت مثلهم ما راح اوصل لمشواري !!
هذا بدل لا يقول راح اعدل نفسي علشان المجتمع يبدأ يتعدل ..
صار للاسف الادب شي غريب في الشوارع ,,, و الوقاحه و قل الاحترام .. عاااااااادي
يعني مره اذكر كنا في السياره الا واحد يبي يدخل المسار الي احنا فيه و احنا مهدين نحسبه يبي يسقط علينا (مثل العاده) و استغربنا انه استنى سيارتنا لين راحة و بعدين دخل على المسار .. و اذكر زوجي قال غريبه ايش فيه هذا واقف و مؤدب .. قلت له يمكن توه جاي من امريكا !!!

هذا في الشوارع .. اما في الاسواق شي ثاني ...
تجيين و توقفين عند الكاشيير الا و ذييك المرأه تسقط عليك .. تبي تحاسب قبلك .. و اذا قلتي لها لو سمحتي انا جايه قبلك .. فهي راح ترد عليك بأحدالردود التاليه .. اما
بسم الله علي طيب طيب .. يمه
لاااااااه انا جايه قبلك من زمان و انا واقفه بس انت ما شفتيني
و اذا هي مره مؤدبه قالت لك .. معليش معليش بس انا مستعجله و ما معي غير غرضين و انت معك ثلاث اغراض !!!!
لازم علشان تحافظين على دورك تلصقين بظهر الي قدامك .. و عسى الامور تسلم .. و لاحظو .. مو بس الحريم الي كذا .. لا انا مرتين الي اروح و يكون معي عيالي و ووقف علشان احاسب و يجي رجل يحاول يدخل قدامي و يحاسب قبلي .. يعني ما يقول عيب هذه وحده و معه عياله يعني ادبا المفروض لو هو قبلي قدمي على نفسه مو يحاول يأخذ دوري !!!
و ما انسى اذكركم وشلون الناس لطيفين مع الاطفال بالاسواق .. يا ناس اذا دخلت السوق في امريكا كل ما ادخل محل او امشي حتى بين المحلات الكل يبتسم لعيالي و لما اسمع كلامهم اقول كأنهم ما عمرهم شافو عيال .. من جد يحسسونك انك عيالك احسن و اجمل و الطف عيال في الدنيا .. اما هنا .. حتى ابتسامه ما تلقينها ,,, مكشرين تقل احد هايشهم قبل لا يدخلون السوق .. سبحان الله ( تبسمك في وجهه اخيك صدقه)

احد الاشياء الي مضايقتني بعد ان اذا جيتي الكل هنا يحاول يعودك على طريقته !! كيف
انا اقولكم ..
اهلك يبونك تحددين ايام لهم ايام رسميه ياوييلك لو تغابين فيها و ايام مو رسميه بس لو ما جيتي لازم تعوضينها ..
و اهل زوجك من ناحيه الكل يبي يحط لك نظام تمشين عليه .. و الكل يحس انك توك جايه يعني عجينه طريه يشكلونها مثل ما يبوون قبل لا تنشف ... و اذا رفضتي .. بدأ الفلم الهندي ... زعل و لا ما يردون عليك زين و لا يتشرهون عليك .. اااااه بس ,..
و الكل يذكرك بحقوقه اهلك و عمانك و خوالك ... و اهل زوجك و عمان زوجك و خواله .. و الكل ينسى او يتناسى حقوق عيالك عليك .. و كأنهم مو موجودين او كأن الشغاله هي المسؤوله عنهم .. و لا اذا قلت ودي اقعد مع عيالي .. قولو و انت راح تتركينهم .. لا جيبيهم معك .. يعني اذا جبتهم كأني راح اشوفهم .. راح يلعبون مع الاطفال و انا لاهيه بالسواليف .. يعني الاساس يالسعوديه انك تملين جدولك ..
الاربعاء مرتبطه و الخميس مرتبطه و الجمعه و السبت و الاحد و الاثنين .. و اذا قلت لاحد كذا قال طيب اجل الثلاثاء فاضيه .. خلاص تعالي الثلاثاء .. اخر شي تركت كل الارتباطات ... صرت ما اطلع الا الاربعاء و الخميس .. و الباقي حسب التساهيل .. طبعا ساعدني جدول المدارس و دراست بنتي .. بس اول ما تجي عطله تعالي شوفي .. يالله تعالي وش عندك الحين ما عندك شي ..
يعني حتى الطلب يجي بهوشه
الله يعين بس .. و ايام العيد و ما ادراك ما ايام العيد .. العيد .. اسمه عيد لانك تعايدين الناس .. لاحظو ( الناس) مو زوجك و لا عيالك .. لاااااااااااااااااا الناس من مشوار لمشوار و من بيت لبيت . و اذا خلص يوم العيد طلعو مشوار ثاني العيد و ثالث العيد و رابع العيد .. لين يخلص العيد و انا ما قعدت لا مع زوجي و لا عيالي ..
و اذا ما تبين تروحين وش راح تعذرين فيه !!! ابي اطلع مع زوجي و عيالي ؟؟؟ ما اظن هذا العذر مقبول ؟؟
اصلا شي غريب على المجتمع انك تفضلين انك تجلسين مع زوجك و اطفالك على الطلعه مع الناس ؟؟
و اذا تبين تسافرين مع زوجك و عيالك .. اقل شي ممكن ينقال لك .. و الله فكره حلوه .. خلينا نروح سوا !!!!!!!!!!!!!!!!!!!!!!!!!!!!!!!!!!!!!!!!

اكمل و لا طفشتكم ..
لا راح اكمل ..
احد الاشياء الي تعتبر من المحرمات .. انك زوجك يساعدك في عيالك !!!!
وشووووووووووووووووو
يساعدك في عيالك !!!!!!!!!!!!!!!!!!!!!!!!!
صاحيه انت ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
رجال طووووول بعرض يمسك عنك العيال .. و اهلك وين راحوووو !!!!
من جد هذه احد المواقف الي صارت لي .. قبل لا تجيني شغاله .. امتنعت عن الطلعات ولدي سنه حرجه و انا بس ادور وراه ما اقعد مع الناس .. الناس يتقهون و انا ادور مع ولدي بالحوش انا و الشغالات .. كل شغاله معه طفل تنتبه له و انا معهم .. لا و طقوها صداقه معي .. صارو يسولفون قلت وش الله حادي اطلع و لا انبسط .. صرت ما اطلع ... لين دخل رمضان صار فيه اجتماع عند اهل زوجي يباركون في الشهر .. قالي زوجي روحي قلت ما اقدر بصراحه .. ولدي يزعجني .. قالي انا راح امسكه بس ما ودي امي تزعل انك ما رحتي تباركين لها بالشهر ... الروحه كلها ساعه او اقل بس على قهوه
و اللهم ياكافي على الي صار ....
زوجك يمسك ولدك .. اص لا تعلمين احد .. صاحيه انت و الله ان يطقونك بعين ..
و بعدين وين امك و را ما حطيتي ولدك عندها !!!!

اقول شكل السلبيات ما تخلص .. بس للامانه انا راح اكتب الايجابيات .. اذا خلصو السلبيات .. علشان ابري ذمتي .. لانه فعلا فيه ايجابيات كثيررررره

للاسف كلامي ما خلص .. بس تعبت ان اشاء الله الباقي في الجزء الثالث ..
راح اتكلم عن البيوت و الشقق و شغل البيت قبل الشغاله و بعدها .. اذا فيه اقتراحات و لا اسئله و لا تعليقات .. لا تبخلون علي فيهم .

الحساسه
اجل عندنا و عنك خير
الله يعين بس
مشكوره اختي على مرورك