شاركي في النقاش

سجلي الدخول لإضافة تعليق.

التعليقات

90

  2. @lomy_alhloh

    CLassic2004
    ورق عنب .. محشي التوست بالجبن واللحم المفروم .. كبه مقليه .. المعجنات بأنواعها والمناقيش.. محشي كوسا .. جريش بالدجاج الحلا .. جيز كيك .. بلاك فورست .. بقلاوه .. جبنيه .. حلا الكرميل بالكيك .. can you plz give me thier recipe ?


    البلاك فورست حطيت طريقتها من قبل .. راجعي الصفحات السابقه ..


    ***

    الجيز كيك ..

    اول شي حضري علبة جلي أحمر فراوله باضافة كاس ماء مغلي وحركيها ثم اضيفي كاس ماء بارد جدا

    واخلطيه وخليه بالثلاجه يبرد كويس..

    في الخلاط .. حطي .. 2 ظرف دريم ويب ... 2 قشطه علب .. 25 حبة جبن كيري .. عصير نص ليمونه

    وخليه يختلط كويس ومده طويله .. بكذا ترتفع ويصير حجمها كبير (يدخلها الهوا)

    وحطيها بالفريز شوي بس على ماتسوين قاعدة الكيكه

    جيبي صينيه بايركس .. صفي فيها بسكوت الشاي المغمس بالحليب عشان يصير طري

    أنا احط 3 طبقات بسكوت وانتي وذوقك .. حسب ماتحبي كمية البسكوت

    وبعدين صبي فوقه خليط الجبن ..

    خليه يجمد في الفريزر كمان 10 دقايق .. طلعيه وصبي عليه الجلي واتركيه في الثلاجه

    لوقت التقديم

    ***

    البقلاوه ..

    هاتي علبة الجلاش ... طلعيها من الفريز وخليها تفك من الثلج ..( استخدم اي نوع ماتفرق معي)

    ولمن تصير بدرجة حرارة الغرفه .. هاتي صينيه مستطيله وادهنيها بزيت بالفرشه ..

    اضيفي طبقة جلاش وحده وامسحيها بالزبده بالفرشه .. بعدين اضيفي فوقها طبقه

    ثانيه جلاش و ادهنيها بالزيت هالمره .. وكرري هالشي مره زيت ومره زبده

    والسر هنا عشان ماتكون دسمه كثير وفيها سعرات كثير وفي نفس الوقت

    فيها نكهة الزبده وطعمها اللذيذ ..

    اذا خلصتي 12 طبقه اضيفي الخلطه المكونه من (جوز مفروم + ماء ورد + قرفه + سكر )

    ثم كرري طبقات الجلاش 12 مره ثانيه .. وأخر شي بالزبده من فوق ..

    قطعيها بالطول أولاً .. ثم بطريقه مائله بالعرض .. زينيها بالمكسرات اذا تحبين

    دخليها الفرن لين تتحمر .. انتبهي لا تحترق .. وبالعافيه ..

    ***

    حلا الكرميل بالكيك ..

    اسوي كيكة الكويكر بالشوكلاته العاديه .. واحطها في صينية البايركس المستطيله

    احطها في الفرن .. ولمن اطلعها أتركها تبرد .. وأكون محضره كريم كرميل مثل ما مكتوب عالعلبه

    واضيف له نص ملعقه صغيره نسكافيه و اصبه وهو حار عالكيكه .. بتتشرب جزء منه وجزء

    بيبقى فوق .. اخليها في الثلاجه لحد ماتبرد واقطعها مربعات واقدمها ...

    وبالعافيه ..

    ***

    الجبنيه ..

    ابشر جبنة موزريلا كميه كبيره .. احطها عالنار لحد ما تبدا تسيح .. اشيل القدر عن النار

    واضيف لها سميد نااااااااااعم .. واخلط لين تتكون لي عجينه .. اضيف لها نقط ماء ورد

    و سكر شوي مو كثير ..

    اتركها تبرد و أقسمها بالنص .. نص افرده و احط عليه قشطه مخلوطه بشوي سكر وموية ورد

    وشوي فستق مفروم خشن .. واغطيها بالنص الثاني من العجينه .. اقصصها مربعات او مثلثات او الشكل اللي تحبينه

    أخليها في الثلاجه في حافظه .. لمن تبرد اسقيها بشيره (قطر) ساخن و اذا برد ارجعها الثلاجه

    وكل ما تنقعت في الثلاجه و طولت اكثر صار طعمها أحلى و بان طعم الجبن أكثر ..

  3. @mshaaal_alsaaodyh

    لومي الحلوه
    البلاك فورست حطيت طريقتها من قبل .. راجعي الصفحات السابقه .. *** الجيز كيك .. اول شي حضري علبة جلي أحمر فراوله باضافة كاس ماء مغلي وحركيها ثم اضيفي كاس ماء بارد جدا واخلطيه وخليه بالثلاجه يبرد كويس.. في الخلاط .. حطي .. 2 ظرف دريم وي…
    اممممممممم مافي شي معين

    اعرف اسوي كل شي تقريبا الحمدلله..

    بس اكثر شي يطلبونه مني الناس حلى القهوه والسلطات

  4. @lomy_alhloh

    CLassic2004
    ورق عنب .. محشي التوست بالجبن واللحم المفروم .. كبه مقليه .. المعجنات بأنواعها والمناقيش.. محشي كوسا .. جريش بالدجاج الحلا .. جيز كيك .. بلاك فورست .. بقلاوه .. جبنيه .. حلا الكرميل بالكيك .. can you plz give me thier recipe ?


    الورق عنب ..

    اخذ ورق عنب اللي ينباع بالكيلو .. من السيفوي .. اغسله كويس عدة مرات عشان يروح التراب منه كله ..

    اخليه في المصفاه .. على ما ينقط مويته ويبدا ينشف .. اكون جهزت الحشوه

    الحشوه (رز+بقدونس+ليمون+زيت زيتون+بهار بحريني+دبس رمان+ملح وفلفل اسود)

    ألف ورق العنب بالحشوه .. اصفه في صينيه واحطه في الفريزر .. لأني اسوي كميات كبيره ..

    واذا جمد أشيله من الصينيه و احطه في أكياس .. وأردها الفريزر ..

    الحين اذا جيت بسويه ..

    أصف في قاع القدر بطاطس شرايح و شرايح جزر و بصل و طماطم ..

    وبعدين اصف فوقه الورق عنب .. و ألحين اصب فوقه مويه مغليه مخلوط معها

    (ماجي .. ملح وفلفل وبهار بحريني .. دبس رمان .. ليمون .. زيت زيتون )

    و أقلب فوقه صحن على قد القدر .. بحيث يكبس على الورق عنب .. وأحط فوقه

    قدر صغير مليان مويه (عشان ينكبس الورق عنب وما يتفكك)

    واخليه يطبخ لين يغلي .. و أطفي النار و أخلي الرز يتشرب المويه ..

    وارجع اشغل النار و اطفيها اذا غلت .. بهالطريقه الرز يظل متماسك ومستوي كويس

    و الورق مايتفكك .. وكل ما تشوفينه بينشف ضيفي مويه مغليه ..

    اذا صار حامض اكثر من اللازم ممكن تغسلينه بالمويه .. ومحد شاف ولا درا ..

    وأي سؤال أنا حاضره ..

    ****

    محشي التوست بالجبن واللحم المفروم ..

    أجهز خلطة اللحم المفروم ( لحم مفروم+بصل مفروم قليل جدا+ثوم مطحون+بهار بحريني مشكل+دارسين أو مايسمونها بالقرفه)

    أشوحها عالنار لين تستوي واول ما اطفي النار اضيف شوي بقدونس مفروم و أتركها تبرد ..

    اجيب اكياس التوست .. 2 أو 3 .. لأني بسوي كميه للفريزر .. وتقعد في الفريزر 6 شهور ماتخرب

    أجيب كاس حجمه كبير بحيث استخدمه قطاعه للتوست .. يعني آخذ أكبر كميه من التوست بحيث ماينرمي منه كثير

    أدهن جهه وحده من كل توسته بالجبن السايل .. وخلج كريمه بالجبن ..

    أحط في وسط التوست من حشوة اللحم و احط عليها توسته ثانيه مدهونه بعد..

    واضغط على الأطراف بيدي بقوه بحيث اسكرها كويس وماتنفتح أثناء القلي ..

    اذا خلصت كل الكميه .. أكسر بيض مع ملعقة حليب لكل بيضه (عشان يصير خفيف وتروح الزفره)

    واغطس كل وحده في البيض كويس .. لازم تتغطى تماما .. وبعدين مباشره في البقسماط

    اصفها في الصينيه واحطها في الفريزر .. لوقت الحاجه .. بعدين وقت ما أحتاج أطلعها من الفريزر

    وأقليها مباشره مايحتاج تفك من الثلج ولا شي ..

    وباقي التوست اللي هو الأطراف احمصه في الفرن و اطحنه.. ويصير بقسماط من صنع يدي ..

    واي سؤال حاضرين ..

    ***

    الكبه المقليه ..

    أجيب لحم مفروم .. بدون دهن .. اختار من الجزار هبره واخليه يفرمها لي ناعم

    في البيت اقسمها .. جزء اضيف له بصل مفروم و قرفه (دارسين) وبهار بحريني و صنوبر

    وملح .. أقليها لين تنشف من مويتها .. واتركها على جنب ..

    الجزء الثاني .. أضيف له البرغل الابيض الخشن .. وملح وفلفل و بهارات مشكله ودارسين

    و أعجنه بيدي كويس .. اقطع اللحم دوائر و احشيها باللحم المستوي و أكببها .. يعني أكورها

    كويس بيدي عشان ماتتفكك .. استخدم المويه في تبليل يدي أثناء تكوير الكبه ..

    أحطها في الفريزر واقلي منها وقت ما أحتاج ..

    ملاحظه .. لازم يكون الزيت حاااااااامي جدا .. أحط الكبه و اخفف عالنار مباشره عشان تستوي من جوه

    وبعدين ارفع النار مره ثانيه عشان تتحمر وتقرمش من بره .. وبالعافيه ..

    ***

    المعجنات والمناقيش ..

    أستخدم نفس العجينه للمعجنات والمناقيش ..

    العجينه ...

    3 كاس دقيق .. كاس مويه دافيه .. ملعقه كبيره خميره فوريه .. رشة ملح .. استكانة زيت

    (بياله ) و نص استكانة سكر ..

    اخلط السكر والخميره والمويه مع بعض و أضيفها للدقيق و اعجنها بالعجانه كويس وأغطيها و أتركها

    ترتاح ساعتين ..

    اطلعها و ارجع اعجنها بيدي واخليها بعد ربع ساعه .. واستخدمها لكل شي ..

    البيتزا و فطاير الجبن و السبانخ و المناقيش ..

    المناقيش .. ارق العجينه مره نحيفه واخليها عالطاوه لين تستوي نص استوا من جهه و اقلبها عالجهه الثانيه

    احط الجبن او الزعتر و اخليها تستوي لين تتحمر ..

    والمعجنات اعتقد سهله طريقة الحشو ..

  5. @lomy_alhloh

    CLassic2004
    ورق عنب .. محشي التوست بالجبن واللحم المفروم .. كبه مقليه .. المعجنات بأنواعها والمناقيش.. محشي كوسا .. جريش بالدجاج الحلا .. جيز كيك .. بلاك فورست .. بقلاوه .. جبنيه .. حلا الكرميل بالكيك .. can you plz give me thier recipe ?


    محشي الكوسا ..

    جيبي كوسا بعدد اللي تحبين .. يفضل يكون متوسط الحجم ..

    قشريها شرايط .. يعني قشريها مخطط .. خط بقشر وخط لأ ..

    بعدين احفريها بالحفاره حقت الكوسا واحتفظي باللي تطلعينه منها على جنب ..

    اقليها في الزيت خفيف لكن .. وخليها تتصفى ..

    اخلطي الرز المصري مع اللي طلعتيه من الكوسى و البقدونس وارجعي احشي الكوسى فيه

    اضيفي عليه المرقه (مرقة لحم او دجاج ) مع صلصة طماطم و ماجي و ملح وفلفل وبهارات و

    زيت زيتون و ليمون وخليه عالنار يغلي لحد مايستوي الرز ويروح اغلب المرقه ..

    وبالعافيه ..

    ***

    جريش الدجاج ..

    انظف الجريش وانقعه ليله كامله (استخدم جريش خشن)

    اسلق الجريش في مويه واضيف معه صدور الدجاج و زبده ..

    اذا استوت صدور الدجاج أطلعها و أفتتها بالشوكه وارجع أرجعها للقدر ..

    اذا بدأت تنشف المويه اضيف بصله مفرومه ناعم و ماجي وملح و بهارات مشكله بحرينيه

    و لبن .. و كل ماينشف اضيف له لبن .. لين مايستوي يحتاج تقريبا 3 او 4 ساعات حسب نوع

    الجريش و الكميه اللي بتحضرينها ..

    وبالعافيه عليكم ..

    واي استفسار حاضرين للحلوين

تابعي تجارب أخرى من هذا القسم.