اعطوني حل لولدي الله يهديه ويخليه لي 😞

والله كانك تتكلمي ع بنتي حتي طايحه في حركه جديده تحذفني ب ايبادها وانتي تعرفي كيف قوي الضرب فيه .. واذا هاوشتها او طقيتها قامت تصيح وتصيح واذا طنشتها تدخل اصبعها ف فمها وتستفرغ عشان تقهرني وانا اهاوش واضربها زود بس شسوي تقهرني بهالحركه بس فكرت اخوفها بعود الكبريت يمكن تتادب 🎃 .. ليتني القي حل كان ساعدتك كلنا ف الهوا سوا 😥😥😥😥😥 الله يصلحهم ويخليهم لنا يارب 💟

الله يعينك اي والله اعرف الايباد والتاب كلها سوا كل شوي يحذفني به 😩 واذا طنشته يبكي بأعلى صوت ويصيح فجر راسي
ياليتهم يهدون والله تعبنا الشكوى لله
لكن الهداوه من ربي والله يافيه اطفال فيهم هداوه سبحان الله ماشاء الله عليهم والله اني اتحسر على عمري جنني بشكل الله لايضيع تعبنا 😟

يا قلبي ...سنتين وعليهم حركات تهبببل...

ابني سنتين وشهرين...وحنوون بسم الله عليه وألاحظ إذا عنفته على خطأ يعصب ويضارب...وإذا حنيت عليه وضميته يهدا ويرتاح ..

شوفي حبيبتي...

في هالعمر يتعلم ولدك كل اللي يخطر ببالك واللي ما يخطر..لأنها فترة تلقين...فإذا لقى من مامته مصدر التعليم بالنسبة له عنف أو ضرب أو صوت عالي وعصبية...راح ياخذها عادة عنده ويكتسبها..وراح ينفذها على الجميع...لأنه مايعرف إلا هالشي...ومعلش على هالكلام..بس من واقع تجربة...

ابني نفس الشي كان إذا شرب رضاعته لازم يكب الباقي على الفراش والأغطية وكل شي قدامه..والمويه يشرب شي بسيط ويكب الباقي على الكنب أو الموكيت...وهكذا ...

بس حاولت ما أعنفه ...صغير فديته وهو في فترة تعلم واستكشاف...مايدري إن هالشي خطأ ...همه يستمتع ويخرب ويشوف النتايج..حاولي إذا خرب أو سوا هالحركات..تبتسمي له ولو غصب عنك...وخذي منه الرضاعه أو الحاجه اللي بيخرب بيها...وكثري من احتضانه...😍أروع شي في هالعمر الضم والقبل صدقيني أي حركة يسويها وحضنتيه بعدها مع قبلة بحنية...ونصحتيه بشكل بسيط راح يعجبه هالشي ويحبك...حتى لو كررها لازم من الحنية عليه...أهم شي لا تضربيه...نفسياتهم تتأثر على المدى البعيد..

حاولي تدخلي دورات وتوفري كتب تربويه حلوه.. في كتاب اسمه طفلي من سنتين إلى 3 حلو اقتنيه فيه معلومات حلوه..

خلي في بالك غاليتي إن كل شي يتعوض ..الموكيت الأغطيه الطاولات...إذا توسخت وتبقعت الله يعينك لازم كرف وصبر...وطولة بال...بس نفسية طفلك ماتتعوض إذا ضربتيه وعنفتيه بينكسر خاطره وبيحس نفسه غير مقبول.. ربي يحفظه لكم..راح يعصب ويضارب ويخرب أنتقاما...ويمكن يكبر وهو كذا..راح يتعبك زياده...

فعلى قدر جلستك معه وتفاهمك وهودئك وصبرك معه...راح يكون معك كذلك إذا كبرتم...😊

فأكسبيه في صفك من ألحين وتفرغي له ولنفسيته...ومستحيل في طفل في سنه وهاااادئ إلا إذا كان مو طبيعي...الطبيعي اللي يحوس ويخرب ويستكشف...ويرمي الأغراض ...

فديتهم كائنات نتف صغيره زي الكتاكيت...لازم لهم احتواء طوووول اليوم...

الحمدلله ابني مايضربني ودااايما يضمني ويبوسني ويقول حبيبي ماما...فديت قلبه..لأني أحاول دايما اضمه ولا أزعل عليه..وإذا جرب وضربني بشويش أسوي نفسي متألمة وأبكي.خخخخ وأشوف الدموع في عينه فديته كسرت خاطره ويقولي آسف...وإذا سوا أي شي ايجابي شجعيه وافرحي وشطور وبطل و و و

مثلا أعطيه مناديل يمسح اللي كبه من الحليب او المويه او العصير...وخليه يمسح معك...وافرحي لانه ساعدك لو شكلا...وشجعيه وضميه...

خلي عقابك له بحنااان...راح تجني ثمرة كلامي بإذن الله بعد فترة...بس طولي بالك عليه ...وخليه مشروع حياتك وتفرغي له ...وأهم شي كل شوي ضميه وسولفي معه..

عذرا أختي طووولت ..ومازال في جعبتي الكثير😆

خخخخ أكيد تقولي ياليتها ماردت...قصة حياتها😂


ربي يسعدكم ويحفظكم ...

ويسعدك ويحفظك حبيبتي الله يخليلك ولدك ماشاء الله عليك بالك طويل
انا مشكلتي مااتحمل 😖😖وهو الله يهديه مايعطيني فرصه ابوسه ولااحضنه يدفني على طول مسوي فيها رجال علي قسم يرفع الضغط الحنيه في جهه وهي في جهه ثانيه بس عندي امل انه يتغير وبحاول بجميع الطرق وبقرى في النت الي قلتيلي عليه

يا دلبي حبيته من كلامك عنه...حسيت إنه كبير ماشاء الله وهو مازال كتكوت صغير...ربي يحفظه ويصلحه لكم..
عندي لك فكره تخليه مع الوقت يصير حنون...
شوفي له لعبه قماش اي نوع عادي وخليها تصير لعبته وصديقته المفضله...والأفضل بدون ملامح للوجه عشان اذا نام معها عادي ...وكل شوي شيلي اللعبة وخليها تكلمه على لسانك وتبوسه وتدلعه وحاوليه يضمها ويبوسها.خخخخ
حتى انتي سوي بلعبته نفس الشي دلعيها وبوسيها..
شوي شوي...راح يحب هالحركات...وجربي ضميه وبوسيه كل شوي...
حبه حبه وإن شاء الله راح يبدأ يحبك و يضمك ويبوسك ويجلس معك...وقتها علميه اللي تبي بحنان ...وإن شاء الله راح يتقبل ويتعدل...
وبالتوفيق قلبي😊