يالله الخيرة...عيّدت مع مورين!!

عاد يوم اني دخلت ولاه التسلب قاعدن متشودخ على الكرسي الخاص فيه....


والله ياهو عز هالتسلب ....ودلال وجلال....ويالله تخلف علانا على قولت رجلي....

يوم اننا ماقد قابلنا قطوة ولاتسلب ولاه مايقوى يمشي من النعمة...


والمساكين في العالم الثالث يموتون مرض وجوع وعطش وجهل ....

مااخفي عليكم انا عندي عقدة من الحيوانات بس ماطلعت لي الا قريب....

يعني اول ماكان عندي عقدة ...كنت الاعب القطاوة واموت في الارانب عقب صرت حتى اذا شفت خشة البعير في قناة الساحة حقت البدو قمت اتاوع...


.مادري وش سالفتي؟؟؟


كيف عاد تسلب ؟؟؟لاوتحسبونه تسلبن بسيط؟؟؟؟


كبر الخروف النعيمي...لو بيطمر على مورين وعلي كان غطانا حنا الثنتين...

وله شوشتن توحّش عنتر بن شداد ياناس....

انا ودي ادري والغنيمة بس من هالتسلاب ماغير قد التوسيخ في الشوارع ماقد مريت شارع الا ألقى أشياءن مكعبرة يمين ويسار....الله يجلكم ....

هذا غير اللي يجن يمرن جنبي وانا من بعد ثلاث امتار اقوم اطامر واسد خشمي لاتتوع تسبدي...

الانغليز الحق يقال تسلابهم مؤدبة(كلشي عندهم مؤدب :) ) مايمرن ولاحتى يطالعن احد غير راعيهن...

سبحان الله حتى معلمين تسلابهم شلون يكونون بحالهم ولايصيرون ملاقيف....حكم والله!!


بس انا عقدي من الحيوانات تكبر...حتى السناجب اللي جنب شقتي اذا شفتها كني شايفتن لي فار اقول لها هش هش روحن عساكن ماتباركن...

بنت اختي تحب الحيوانات وحاسدتني على (نعمة) السناجب....

وانا هكاليوم بغى السنجوب يمشخ وجهي طمر علي طمرتن قشرا وانا رايحتن اكب الزبالة...

يعني ان كاني رجعت للسعودية وراسي نصه شيب فهو بسبب تسلاب الانغليز وسناجبهم عساهم للصلاح...


المهم وانت ياتسلب مورين قاعدن متشودخ تقل شيخ عرب مابقى الا فروة وعقال وربابة...


قلت ايه ....طيبكم وخيركم في الحيوانات ...

عاد هي شافتني اتململ من التسلب وتقول لي ماهوب موذي يابنيتي ...

قلت موذي ولا موب موذي المهم انه تسلب وانا اخاف من الحيوانات يامورين.......

تكفين خليه يطس عنا...

قالت بس ؟؟؟ولايهمتس..


ومير تقول له رح ياوليدي للغرفة الثانية ....


لو انها سعودية تسان صرخت عليه طس عنا فشلتنا واخزياه بالحرمة ...

بس شوفي شلون تعاملهم حتى مع التسلاب :)


وسبحان الله هكالسخرة ...يطمر تقولين آدمي ويدخل الغرفة !!!!!!!!!!!!!!!!



وهي الضعيفة تقوم تضلع تبي تضف الحوسة الي على كنبتها وتقول لي ماعليه امس كانوا عندي ضيوف وحاسوا البيت...


قلت امحق تسني ماقد شفت بيت انغليزي من قبل؟؟

هلحين الامني طلعت اكب الزبالة بالفناء الخلفي حقي يمديني اشوف درايش الجيران واقز بيوتهم من الداخل...

طبعا انا ماتلصلص ولااتجسس :)

بس تقع عيني ...بس تقع ...هي تروح عيني موب انا اقولها....:)


واشوف الهوايل من ورا الدرايش ....

اجل تخيلوا هكاليوم كان يوم طلعت اكب الزبالة واشوف المجلى حق جارتي الي بالعمارة التالية مليان صحون وشين بني وكيسان وملاعقن مجدّعة هنا وهناك....


+شرابة وحيدة محطوطتن على الهيتر ....مادري وين فردتها عاد...

وطاولتن محطوطن عليها خلاقين وكتب وصحن اكل مادري وش بوسطه وااااااااااااااااع ...

طلعت بكره والاها بمكانها ماتحرك منها شي بس ان الشرابة اختفت ....مادري تبخرت مع الهيتر ولا انها شالتها...

والمهم وعلى هالحالة اسبوع احسبن البيت مهجور وربي ....اجل بيتن فيه مجلى بصحون وكيسان ماتغسل وهدومن مكومة؟؟؟


المهم ويفرجها ربي عقب اسبوع اجي القاها غاسلتن مويعيناتها وشايلتن خلاقينها...

حق انه انجح برنامج عندهم برنامج (هاو كلين از يور هاوس)...ويعرض هالبرنامج الهوايل والفجائع الي ماتخطر على بال احد...

بس بيني وبينكم بعذهرم يصيرون هالوساخة لأمرين كما وضح زوجي الحبيب:

اولا مايستقبلون ضيوف كثير ترا زينا....


وثانيا لو جاهم ضيوف وش المشكلة لو حوسة كل الدعوى رقعة الثوب منه وفيه...يعني ان كان بيتي حوسة فبيت جارتي احوس ....وليه اخجل يعني؟؟؟؟

وثالثا بيوتهم تنظيفها صعب الحق يقال....

ضيقة ...المجلى حقي يالله ادخل يدي فيه...وحوض واحد بس..

مفروشة ....والفرشة تنظيفها صعب جدا بدون هوفر (مكنسة كهرب)...


والاهم من ذلك ان مطابخهم تكون مفروشة وحماماتهم بعد.....ولافي فتحات تصريف ...

لذلك تعتمدين في التنظيف على التمسيح ...موب الشطف زي السعودية...

وغير ذلك مافي شطافات اصلا عشان تستمعين بتبذير الموية زي السعودي وتش تش ياتش....

لذلك كونها وسخة وغير مرتبة فهو الامر الطبيعي ..
وغير الطبيعي ان البيت يكون مرتب ويلمع..فهذا يعني واحد من اثنين ...

إما انه توه مسكون....


والا ان الي ساكنينه فيهم وسواس نظافة ويحتاجون علاج نفسي....


...................................يتبع...

هلااااا عنوني شوفي من ناحية الكلابه نهانا ديننا عن تربيتها وعن الأكل من الانا اللي ياكل أو يشرب منه الكلب صحيح ورد هو وخويه الخنزير في القرأن لكن ارجعي للأيات وشوفي صيغة الذكر ..
والخنزير مايحتااج أقولك ليش نفس الانساان تكرم عنه ( شوفي وش ياكل ) أعزك الله عنه واللي يقروون
المهم ان حتسيس ماينمل وكاااد انتس وسعتي صدورنا

مورين تحسبني جايتن اقدم لها معروض وظيفة....بس يوم انها شافتني طلعت زمزميتي وقلت لها هذي السأودي كاوا...


وهي عيونها بهامتها مادري مستغربة ولافرحانة ...او انها ماقد شافت زمزمية ؟؟؟

زمزميتي ام نقطة حمرا مادري هي يبيعونها هنا ولا لا..


قلت هذي شي شي يامورين ....وتصلح للفيجيتارين ...قالت لي لاوالله؟؟؟؟

ومن قال لك اني فيجيتارين ؟؟؟


الخبر ان العجز الامنهم صارو كبرتس يامورين يمتنعون عن السكر والدهن وكل الاشياء الي ماتنهضم...


قالت لي لا ياحليلتي انا عمري سبع وسبعين وللحين آكل لحم ودهن وهذاني آخذ الدرجة بطمرتين...


أنشط من الخيل...


قلت والله ماشالله لااله الا الله تحيطتس يامورين...امهاتنا يابعد الدنيا ولااحسدك ان الوحدة منهم شربت قهوة بها هيل شبت عليها تسبدها حرقان وآلام ...

او ان شربت شاهين به شويت سكر والا قطيعت حلى داخت ياحياتي حياتها...

واللي بها قولون واللي بها مر من الحرات ورجالنا هاللي يعرسون علينا...


على فكرة رجلتس ماعرس عليتس مورين؟؟؟؟


قامت تمسمس الكاس وتشمشمه وهي تضحك وتقول اييييييييه رجلي يرقد في سلام من زماااااااان...


قلت ايه يالله التوبة...ومتاه ميت؟؟؟


قالت لي وهي تبتسم ماكنه مات: رجلي محارب قديم...حين مات مات وهو رجل قوي ...

قلت ماتبي تقول لي لاتقول لي .........


قلت لها مورين وش رايتس بحلاي؟؟؟

قالت يهبل انتي اللي مزينته يابادورا؟؟

قلت ايه اجل من؟؟؟

قالت حلو ولكن اخشى انه يسوس بسنوني ....خبركم عجيزن طايحتن سنونها ماتقوى تفرم شي...

قالت لي مورين وهي تضحك: انتي فتاتن تجيدين الطبخ...دايم اشم ريحت طبختس الليل والنهار...ماقد قعدتي على حيلتس؟؟


قلت ايه لازم عندي رجلن اكول ولازم له وقت طويل عشان نرضيه ...

قالت ومادامنه اكول ورا مايطبخ لنفسه ؟؟؟


قلت مايعرف يامورين مايعرف....أرفل والمشكى على الله...


طبعا استحيت اقولها ان الرجال عندنا عيب يطبخ اخاف تقول متخلفين ...انا منب ناقصة..


قالت اييييييييييه ....طب اجل على كذه كيف تقضين يومك..

قلت ابد ياخالة...ماغير اقوم الصبح ادخل النت والا اطلع اتقضى من سينز بري همن انكس وانظف البيت واطبخ غداي..همن اغسل مواعين الغدا ...همن ابدا اسوي العشا همن اغسل مواعين العشا...


طارت عيونها الحرمة قالت ماتسوين شي ماتزورين صديقاتك ماتطلعين تمرنين...

قلت مورين انا وبالحسرة تعرفت عليتس تبيني اروح صديقاتي؟؟؟


قالت تمرنين قالت ...


الحق يقال ان مورين جازت لها قهوتي لأني اكثر الزعفران وقلت لها يامورين تراه جيفران ....تعرفين الجيفران ؟؟؟؟قالت اسمع به في برنامج الطبخ...

وتقوم تهرج عن حياتها البسيطة...

ضعيفة الله مالها غير ولدين ساكنين هنا في برايتن ويسيرون عليها عن هرجها....

وماغير هالتسلب تقوم تمشيه كل صبح همن تمر ساينز بري تجيب لها حليب وحبوب وخبز وتنكس...


كانها فاضية راحت سيرت ضحوية على حدا خوياتها...

استغربت لما عرفت انهم حتى عندهم ضحوية ...:)

تنكس بيتها وقت العصر ...

وتصلح عشاها وتاكله وتنام الا جا المغرب..زي الدجاج يالله الجنة...


يوم الاحد تروح الكنيسة تصلي ....وهذا التغيير الوحيد في اسبوعها الروتيني...وتنكس لبيتها تطالع التلفزيون...وبس...


مورين ماتحب القراءة....ولذلك ماعندها كتب ولاغيره....ماغير ابر كروشيه وصوف منطلة هنا وهناك...


يعني امراة اشغال يدوية...ياناس حركات يامورين...


قلت لها مورين والله اشغالك بالابرة انها تهبل ورا ماتبيعينها؟؟؟


قالت لي وهي تضحك...كل شغل من هالاشغال يعتبر ذكرى جميلة لي....


ولأنها تكلمت كثير عن نفسها فقد حان الوقت اني اتحدث عن نفسي...


انتي من وين يابادورا؟؟


قلت من السأودية...ساودي ارابيا...:)


قالت ونعم يابنيتي بس ليه منتب عراقية؟؟؟

قلت عاد والله منب عراقية انا ربي خالقني سعودية...

ليه جبتي سيرة العراق يامورين؟؟؟

قالت الحرب ...الحرب اللي لعبت بالعراق...دايم اشوفهم واصلي من اجلهم...

وابكي لأن بلدنا متورط في حرب أثيمة زي هالحرب..


مورين ماهيب اول وحدة ولااخر وحدة من البريطانيين اللي مستعرين من تدخل حكومتهم في حرب العراق الدموية...


وفي برايتن رغم صغرها وابتعادها عن مسرح الاحداث البريطانية الا انه موب غريب انكم تشوفون كوشكات تضامن وتوقيعات ضد الحرب ومطالبات بايقاف المهزلة الامريكية ضد العراق...


ويقومون باللي عليهم ...اقله ينشرون الوعي بوجود مشاكل تسببها حكومتهم في العالم..

ذاك اليوم مريت بواحد من الاكشاك متضامن ضد ضرب سوريا وايران...وقمت من الحماس وقعت لين قلت بس ....


وشريت دبابيس ولافتات لاللارهاب والحرب ....

وجيت اطلع اسوي مظاهرة بس عيا ابونا...

فالمراد ان مورين واحدة من الوف الناس هنا تؤمن بان الحرب امر شرير مهما كانت دوافعه....

وان المأساة العراقية مسؤوليتها ترجع اولا واخيرا الى تركز القوة في يد غير حكيمة...

كانت تقول لي أنتي تشبهين العراقيات كثير اللي يطلعون بالتلفزيون...

قلت لها والله تو ماطختني القبلة والملح والحلاوة والله...



الله ينظر لهم بعين رحمته ويجمع قلوبهم على الحق ويكف عنهم الهرج والقتل قولوا امين ...



قلت لها انا موب بس اشبه العراقيين ولكن احب كل شي يتعلق بالعراقيين....

والعراقيين جزء منا مثلما حنا جزء منهم....

قالت حلو يابادورا...


لكن ماتلاحظين انك تعتبرين وحيدة في هالعالم؟؟؟


قلت شلون؟؟

قالت لي شوفي يابنيتي...

علمتني الحياة الطويلة اللي عشتها ان المحبة أكبر ثمرة ممكن نجنيها ...ولكنها من اجل انفسنا ...موب من اجل الآخرين....


يعني حبي الآخرين وسامحيهم وتمني لهم الخير عشان نفسك...موب عشانهم....

لأنه بقدر مافي هالدنيا ناس بتلقين كراهية وحقد وتعصب وعنصرية..

وماراح تنتهي هالاشياء من حياتنا....

بس اللي بتجنينه انك تنامين وانتي مرتاحة من اثم الكراهية....

وانتي ماعليتس من الآخرين ....لأنك لو مابتحبين الا اللي يحبتس بتتعبين...

ومانتيب لاقيتن احدن تحبينه حقيقة..




صبي فنجال وانا خالتس...


...............................يتبع..

هلا حبيبتي مشاعل ....

انا اكيد اعرف ان تربية الكلاب محرم....

وان الخنازير مايجوز اكلها هذا واحد +واحد = ثنين

ولكن هل يجوز اننا نستكبر عنها او نتكلم عنها بتقزز وهي من خلق الله؟؟؟



هذا اللي دايم محيرني....

لأنها حتى وان سوت شي مقزز الا انه ماورد في القرآن الكريم ان الله استقبح ذكر الكلب والخنزير...

الخنزير ورد في قوله تعالى بصيغة تحريم (إنما حرم عليكم الميتة والدم ولحم الخنزير ومااهل به لغير الله)

والكلب ورد في سورة الكهف اكثر من مرة بصيغة المرافقة لأهل الكلب وبالعكس كان ذكره نوع من الاضافة الجميلة للقصة....وماكان بصيغة تقزز....


وكذلك قوله تعالى فمثله كمثل الكلب ان تحمل عليه يلهث او تتركه يلهث هو صيغة تشبيه للضال في ضلاله بحالة لهاث الكلب المستمرة...وليس للتقزز منه...

ياحليلك يابدورة والله انك تونسين ماودك تصيرين جارتي وتراني احب الحلا انا بجي لمانشستر