الله يسعدك ويفرح قلبك باللي بخاطرك وأكثر يا مارينا.. قولي آمين
بصراحة وانا أقرأ كلامك ووصفك قلت هذي وزنها فوق الـ150كيلو واكيد قصيرة.. والوزن الزائد متمركز بالجزء العلوي لانه فعلا بيبان اكثر من بالجزء السفلي
طلع ماشاء الله ربي حافظك، طولك حلو.. وماعندك الوزن البشع اللي وصفتيه.
شوفي يا قلبي اذكري الله وصلِ على النبي، وركزي معي.. كل داء وله دواء بإذن الله..
انتي عندك طريقين لاثالث لهما..
الاول: تلاحظين انك فعلا تكوني ملتزمة بالدايت والرياضة فترة ممكن نقول لا تقل عن 3 شهور متصلة بس مافيه نتيجة.. وزنك ما يتغير الا شي لا يذكر.. هنا يمكن عندك مشكلة صحية تأخر نزول وزنك مثل مشكلة بالغدد.. هرمونات.. كورتيزول.. نقص فيتامين دال.. فقر دم.. تكيس مبايض.. الخ، وهذي حلها مو هنا لازم تراجعين طبيب ويعمل لك فحوصات دم ومتابعة وأدوية.
الثاني: انه ماعندك مشاكل صحية.. بس عاداتك الغذائية ونمط حياتك غلط.. قد تكونين واعية لهذا الشي وقد تكونين مو منتبهة.. وكلما تبدأين نظام ماتلتزمين الالتزام القوي سواء بتغيير العادات او بالاستمرار لفترة معقولة تظهر فيها النتائج (وهذي تختلف من جسم لجسم، فيه أجسام تستجيب بسرعة واجسام تتاخر) ممكن تتعبين وتوقفين وترجعين لنقطة الصفر بل بالعكس يمكن يرجع وزنك اللي خسرتيه وفوقه كم كيلو زيادة.. ودخلنا الدوامة المتعبة والمحبطة.. بس هذا له حل وتقدرين تنزلين الوزن الزائد وتوصلين لهدفك.. بس متى، وكم المدة.. ما نعرف لأن الأجسام تختلف
اهم شيء الالتزام والاستمرار.. وركزي ع ثلاث نقاط مهمة..
النظام الغذائي (وشرب الماء): حسب قدرتك المادية وتوفر المواد الغذائية وحسب الاكلات اللي انتي تحبيها حتى تقدرين تستمرين.. يعني ما اقدر اقول لوحدة ما تحب اللحوم والبيض اتبعي اتكنز.. او وحدة تحب الوجبات الكبيرة اتبعي نظام اللقيمات.. إما تتبعين اكل صحي منوع وتنتبهي فيه للسعرات والكميات.. وممكن تتبعين نظام لا يركز ع السعرات ولكن ع نوعية الأكل وعادة هذا النوع صارم بس نتائجه جيدة مثل الكيتو والاتكنز (انتبهي لأخذ الفيتامينات ان احتجتي)والصوم طبعا ممتاااااز
الرياضة: ضرورية جدا جدا.. وفيه بعض الأجسام ماتنحف ع الدايت إلا بالرياضة.. كذا طبيعة جسمها شئنا أم أبينا.. الجسم لازم تصدميه بالتمارين حتى يرتفع الحرق.. ابدأي بالتدريج بالمشي.. ممكن نص ساعة،، وبعدها نزود وتصير ساعة واذا صعب قسميها نص ساعة الصباح ونص ساعة المساء وهكذا.. والتمارين الهوائية او الكارديو عندك اليوتيوب مليااااان اشكال وألوان. التمرين اهم شي تركزين فيه ع المدة والقوة، يعني ما يصير مشي سوق لا.. وممكن تابعين تقنيات hiit يعني دقيقة مشي عادي وبعده دقيقة مشي سريع و ترجعين مشي عادي وبعده سريع.. واذا تحسنت لياقتك، السريع يصير هرولة وهكذاوممكن بآخر خمس دقايق من تمرينك تخليه هرولة يعني شدي ع نفسك شوي.. ضروري نزيد سرعة دقات القلب (بالمعقول طبعا)والرياضة ع معدة فاضية (بآخر ساعة من الصوم) قد يناسبك جدا وتشوفين معه نتائج جباااااارةوطبعا لازم تمارين تسخين واطالة قبل وبعد التمرين.. لتجنب الإصابات. لو عندك مشكلة بالركبة ممكن تلبسين ضاغط خاص يحميها مع تمارين التقوية الخاصة بالركبة.
الراحة: الراحة النفسية، فلاتفكرين كثير ولاتتوترين وركزي ع العبادات والسنن وقراءة القرآن والصدقة والاستغفار والحوقلة (عودي لسانك ع هالشي) والهدوء والاستسلام لمشيئة رب العالمين.. ريحي بالك❤ اضحكي واستانسي مع اهلك او صديقاتك ومارسي هواية تحبينها.. وشغلي وفعّلي الإيجابية بحياتك وبرمجي نفسك عصبيا انه السالفة أسهل مما تتصورين.
والراحة الجسدية، لازم يوم واحد بالاسبوع راحة من التمارين ووجبة مفتوحة وحدة مرة بالاسبوع، ونوم الليل مثلا 7ساعات متواصلة، ممكن تشربي منقوع بابونج بالمساء للاسترخاء.. ادهني ومسجي راسك.. وبعد فيه آلات وادوات بسيطة تساعدك في عمل مساج خفيف لعضلات جسمك. زيتي جسمك قبل التمرين حتى لو بزيت سمسم.. واعملي سكرب لجسمك أثناء الشاور حتى لو صابونية قهوة انتي تعمليها بنفسك.. ورطبي جسمك دايم.
وآخر شي دوري ع بنت عندها نفس اهدافك تدعمك او تتحداك وتنافسك خلال هالرحلة.. ممكن تدخلين جروب هنا بالمنتدى او تضيفين حسابات دايت ع الانستاجرام او السناب او اي وسائل تواصل تحفزك ع الاستمرار او تكتشفين طرق وأساليب وطبخات جديدة ماكنت تعرفينها بهالعالم الجميل❤ وسجلي وزنك وقياساتك بمذكرة خاصة.
اسفة ع الاطالة🙏.. بس صدقيني عن تجربة، الموضوع سهل، واعتبريه نظام حياة مو دايت وحرمان حتى تقدرين تستمرين لهدفك بصحتك وعافيتك من غير شر

رفع رفع الله قدركم

والله حتى انا تعبت من وزني ودي احد يحمسني
شرايك نسوي رجيم مع بعض ونحمس بعض لين مانوصل للمثالي

اول شي ياعيني ترا على طولك ماشاءالله 170 لو يوصل وزنك ل80 يكون مقبول ومريح لك شوي حاولي تسوين رجيم التمر واللبن ' ادخلي اليوتيوب وابحثي عن تمارين البطن والارداف والزنود اصلا فكري بنفسك انو حرام هالعمر يمر. وانتي مانبسطتي بجمالك خلي عندك اهداف لما تحطمين نفسك ماراح تستفيدي حاجه ولا شي وحتى كلام الناس عمره ماراح يفيد لازم تحبي نفسك كلام الناس ارميه وراء ظهرك اذا بتنحفي انحفي لنفسك ولصحتك واللي يحبك يقبلك بكل مافيك لا تحطين يدك خدك وتجرين الحزن على نفسك توك صغيره والعمر قدامك لا تقضي عمر بالهم والنكد وبأذن الله تنحفين وتوصلين للي في بالك وربي يسعدك ويسخر لك الطيبين من خلقه وخلي عزيمتك واصرارك قوي راح تنحفين بأذن الله 😘

حتى انا خذوني معاك ببدا في رجيم التمر واللبن