تبون تضعفون بدون رجيم ؟؟؟ تعالو ...بس التزمو

السلام عليكم
اول شي انا مو متينه ومع هذا فيني هوس الرجيم لدرجه اني ماخليت موضوع ولا رجيم ماقريته او سويته ولو اقولكم وزني بتنصدمون بتقولون انتي ضعيفه وهبله شتبين بالرجيم .. بس انا اسويه عشان تروح الكرشه ( كرشه الولاده طبعا :11: ) وعشان يخف لحم الظهر ويطلع الخصر .. يعني انا من الصدر وفوق ماكو لحم بس باطه جبدي الكرشه ومع هذا عندي خبره بهالموضوع .. بس اللي قاهرني اني اذا سويت رجيم وجهي يضعف

المهم انا حامل الحين وبس اكل وابلع بعوض الحرمان لاني اذا ولدت برد للنظام اللي سويته قبل

المره الوحيده اللي رحت فيها اخصائيه تغذيه ( فوزيه العوضي ) كتبتلي الخبيره نظام غذائي نزلت عليه 6 كيلو وقلت الحمدالله وبعدها بديت انا اتعود عليه

لكن عقبها قمت اعتمد على روحي بدون رجيم.. قولو شلون ؟؟ اي قلتو شلون :o بقولكم المختصر المفيد ( اخيرا عقب هالقرقه بقول شي مفيد )

بس اول شي لازم يكون عندكم اراده ... اللي ماعندها اراده لااتكمل الموضوع وتضغط back
واللي عندها ارادة وبتقرا لازم تلتزم وتقول النتيجه كل اسبوع بكل صدق وامانه وتقول اذا خربت النظام والا لا


1- على الريق شرب من كوب الى 4 اكواب ماي دافي ( يعني تدريجيا كل يوم لين توصلين بعد فتره الى 4اكواب وغير انه يضعف بيشفي من امراض واجد )
2- ابعدي عن السكر نهائيا وبدليه بالعسل الطبيعي او سكر الاناناس
3- ابعدي عن المشروبات الغازيه
4- ابعدي عن المقليات والدهنيات واستعيضي عنها بالمسلوق والمشوي
5- ابعدي عن الخبز الابيض واكلي بداله توست اسمر او خبز اسمر
6- لاتاكلين عيش نهائيا ( انا بس اقطع العيش الكرش تخف حيييييييل وبس اردله تنتفخ جني حامل 6 شهور :06: )
7- لاتشربين ماي او سوائل مع الاكل الا كميةبسيطه اذا بتغصين وتموتين :42:
8- الماي قبل الاكل بنص ساعه وبعد الاكل بساعتين
9- ممنوع الفواكه بعد الاكل نهائيا لانج ماراح تستفيدين منها وبتسوي عسر هضم
10 بين الوجبات اذا جعتي اكلي فواكه بس بشرط بعد الاكل ب 3 ساعات والافضل تكون من نفس النوع يعني مو تخبصين تاكلين مليون نوع فواكه بس لاتاكلين موز او اكلي شابوره سمره وفي نوع خاص بالرجيم
11- اذا اشتهيتي كاكاو اكلي كاكاو ابيض او كاكاو السكري بس قطعه صغيره
12- اشربي قهوه خاصه بالرجيم يبيعونها بالامارات اشوفلكم اسمها واكتبه بعدين ( عجزانه اروح المطبخ ) بس مو شرط بس تساعد
13- ابتعدي عن الحلويات والسكريات نهائيا ( وصدقيني ماراح تموتين )
14- ابتعدي عن الفطاير والصمون لان فيها خميره تنفخج
15- اكلي كل شي مفيد مثل سلطه - مشاوي - مرق خضار ولحم او دجاج وخبز اسمر - سمك - ربيان ..بس ابتعدي عن الاصناف اللي فوق
16- اكلي جريب فروت اذا تقدرين والاناناس يضعف بعد ( الطبيعي طبعا )
17- تعشي قبل النوم ب 3 ساعات مو تتعشين وتنامين ديري بالج
18- كل يوم العصر اشربي شاي اخضر مع نعناع
19- اذا كليتي حاولي تاكلين ثلث الطعام لان الرسول صلى الله عليه وسلم قال ثلث لطعامك يعني خففي اكلج ( فيه ناس تاكل من كل شي بس تخفف وماتوصل مرحلة الشبع ) تخيلي زهيوي والا شعر الخدامه باكلج بتلوع جبدج وبتقومين :42::21:
20- صيري ذربه شوي واكلي شوي شوي لان المعده يبيلها 20 دقيقه عشان تحس بالشبع واذا كليتي بسرعه بتترسينها قبل لاتخلص ال 20 دقيقه
21- اذا رحتي ناس وعطوج حلوو فطاير او عشا دسم لاتاكلين واجد اكلي شوي مجامله
22- اهم شي الحركه ( الشغل بالبيت - المشي يوميا لو نص ساعه بره البيت او بجهاز المشي - او بالدراجه - او اقعدي جدام المرايه وارقصي عشان اذا دش زوجج قال الحمدالله والشكر انجنت المره :o ) المهم حركي جسمج لان تخفيف بدون حركه مستحيل تضعفين

اللي ماتبي تضعف واجد تبتعد عن كل شي قلته فوق بس عادي تاكل وتشبع ( يعني تشبع الا شوي ) يعني تاكل اكثر من الثلث ( ثلاث ارباع :23: )

امشو على نصايحي واقص ايدي اذا ماخفيتو وضعفتو ولاتقولون نبي نضعف بسرعه لان اللي تضعف بسرعه .. ترد تمتن بسرعه هذا غير الدوخه والتعب اللي بتحصلها
ومو كل رجيم يناسبج يعني اللي يناسب غيرج مو شرط يناسبج .. لاني اشوف مواضيع بالمنتدى كل وحده حاطه رجيم وتدعي العضوات يجربونه او تقول انه بديت رجيم مع الدكتور وتبيهم يشاركونها ونست ان الدكتور سوالها تحاليل وكتب لها رجيم يناسب حالتها الصحيه اللي ممكن مايناسب عضوة ثانيه وممكن يسوي لها انتكاسه او يضرها

طريقتي الافضل لانها ماتضرج بالعكس بتروح عنج مشاكل الغازات والقولون والجهاز الهضمي

جربوها تكفون بإراده قويه وادعولي بس الله يخليكم التزمو
ترا تعبت وانا اكتبلكم خلاصة تجاربي <=== امششششش يالاسلوب :o ..
صدقوني هذا نتاج خبرتي مو كتب او سامعتها من وحده او قاريتها بمنتدى .. وحتى لو تعلمت اشياء من كتب او منتديات المهم اني استفدت منها وقلتها لكم بس مانقلتها لاني خذيتها كمعلومه
وعلى فكره اللي يضعف وجهي هالرجيمات اللي امشي واسويهم ويتعبوني

تحياتي :26: