كيف انقصت من وزني عشرة كيلو

بسم الله الرحمن الرحيم
الحمد لله انا قدرت انقص وزني من 65.5 كيلو
الى 54.7 كيلو , وطولي 160
طبعا لسا مشواري الى الخمسين وان شاء الله بكل صحة وطبعا ما ابي انقص عن الحد الطبيعي انما ابي اتخلص من الدهون الزايدة

نقصت وزني بدون ريجيم ولا خلطات ولا شيء
في خمس شهور

يمكن البعض يفكر ويقول خمس شهور فترة طويلة نبي ينزل عشرة كيلو باسبوعين
لاوالله؟

بعض المعلومات للي يبون نزول سريع
- اول اسبوعين من النظام الوزن ينزل سوائل طبعا مو دهن
- نزول الوزن الطبيعي للمرأة اسبوعيا نصف كيلو دهون الى كيلو ونص دهون واذا نزلناه اكثر هذا مو دهن هذا سوائل وعضلات
- مستحيل مستحييييل ننحف جهة وحدة من الجسم بدون ما ننحف الباقي
- ما في تمرين ينحف جهة وحدة , يعني مثلا تمارين المعدة مستحيل تشيل الكرش ولكنها تشد الجلد شوي وتبني عضلات مفيدة
- الدهون انواع ، عنيدة وبسيطة ، يعني الدهون العنيدة هي اللي نبيها تنزل لكن تاخذ وقت طويل فلازم صبر
- الوزن لما ينزل بسرعة معناها ان خسرنا عضلات وسوائل , لما نخسر عضلات جسمنا يخزن دهن مكان العضلات
- الريجيمات كلها تقريبا مضرة بالصحة ، وخاصة الكيميائية لانها ناقصة
- اللي اوزانهم كبييرة طبيعي ينقصون وزن اكثر
- الريجيمات وتقليل الاكل بشكل مضر يسبب تخزين الجسم للدهون لان الجسم يخاف من نقص الطاقة
- من نتائج الريجيمات تساقط الشعر , شحوب الوجه وصفار البشرة , تكسر الاظافر , ومشاكل صحية كثييرة اهمها فقر الدم
- الريجيمات اللي تحدد لك وش تاكلين ما تناسب الكل طبعا , عشان كذا اللي يسوونها ينقص وزنهم وبعدين يزيد اكثر من قبل
- الريجيم اصلا شيء ممل وما منه فايدة اذا كان مؤقت
- مافي اي نوع اكل او شرب يحرق الدهون , كلها تجي المعدة وتنهضم وتروح حالها حال باقي الاكل
- عدم تجويع النفس
- التركيز على نوع واحد من الاكل خطأ كبير
- الاكثار من الفواكه غير صحي طبعا
- تصديق كلام الناس ( لا تاكل رز تراه يسمن , لا تاكل دجاج يسمن , لا تاكل موز يسمن , شرايكم نقعد بدون اكل مثلا؟ )

الحين النظام السهل
طبعا الوزن ينقص ببطيء معناها الدهون هي اللي تروح وان الجلد ينشد
اكيد ولا وحدة منكم تبي ترهلات وان الوزن يرجع بعدين؟


السالفة بسيطة !

- تغيير الخيارات , يعني بدل ما نقلي الاكل نشويه , بدل الخبز الابيض نستخدم الاسمر لانه مليان الياف وافضل بعد النخالة لانه خالي من السكر
- تقليل السكر والملح , مثلا بدل السكر نستخدم بدائل سكر طبيعية , مو اللي كلها كيمئيائيات , ونعتدل مو عشر اظرف بساعة
- استبدال كامل الدسم بقليل الدسم
- عدم تجاهل الفطور ابدا ابدا
- هذي المعلومة شكلها بتعجبكم : كلما اكلنا كلما نحفنا , يعني كيف؟ الجسم عشان تستمر عملية الايض ( اللي هي تحرق الدهون ) لازم ناكل , يعني بدال ما نضل ساعات بدون اكل لازم ناكل اي شيء خفيف مثل الفاكهة او شوي خضار
- عدم شرب العصائر بكثر : طبعا العصير كله سكر وسعرات وما يشبع , مثلا بدل ما نعصر الفاكهة لازم نحطها بخلاط وكذا كان احنا اكلناها مثل ماهي
- عدم شرب او اكل اي شيء فيه سكر بعد الوجبة : اذا اكلنا حلى او عصير بعد الوجبة بيرتفع الانسلين وبيخزن دهون الاكل
- العشاء المبكر : طبعا ماعليكم من اللي يقول لا تاكل بعد الساعة كذا , الجسم مو مركب فيه ساعة عشان يعرف وش الوقت الحين , لكن العشاء يصير مبكر وخفيف , وطبعا ما ننام بعد العشاء لازم ينهضم . ساعتين او ثلاث بعد العشاء , واذا كان فاكهة او زبادي مثلا او خفيف مرة يكفي ساعة
- عدم النوم على الجوع : طبعا قلنا ما ننام بعد الاكل بس ما نموت جوع , اذا جعنا بنص الليل ناكل شيء خفيف وصحي
- شرب الماء قبل الاكل عشان يملأ المعدة ونشبع اسرع
- الاكل ببطيء وبلقمات صغيرة
- التوقف عن الاكل اول ما يروح الجوع مو لازم نملأ البطن
- التقليل من الحلويات بس مو ضروري نقطعها , قطعة شكلاتة غامقة صغيرة يوميا مفيد جدا , اما باقي الشكلاتات والحلويات مرة بالاسبوع
- الاكل المتكامل : نشويات كاملة القمح يعني سمراء او نخالة , بروتين من اللحوم والبيض وبعض الموارد النباتية , الياف من الخضار
- عدم الاكثار من الاكل حتى لو صحي : المعدة ما تفرق بين الاكل الصحي والغير صحي , اللي يجيها تهضمه والزايد يصير دهون
- مافي اكل يسمن اذا اعتدلنا فيه , يعني مثلا الرز نسلقه بدون اضافات واحسن كمية هي خمس ملاعق اكل
- اخذ وجبة مفتوحة كل اسبوع او اسبوعين عشان ما نمل , فطور او غداء فقط واحد منهم بس العشاء لا
- اكل على الاقل خمس وجبات : يعني فطور كبير , وبعد كم ساعة بالكثير ثلاث او اربع ناكل شيء خفيف , الغداء كميته وسط , وبعد كم ساعة ناكل شيء خفيف , وبعد صلاة المغرب او العشاء مثلا ناكل عشاء خفييف مثل الزبادي قليل الدسم
- اسبدال الغير صحي بصحي : مثلا انا اليوم بغيت حلى , وش سويت؟ اخذت بدل الطحين الابيض اسمر , بدون سكر , بدل ما نحط بيضة كاملة نستخدم بس البياضة لانه اقل سعرات بكثير من الصفار (الصفار مفيد طبعا وخاصة بالفكور )
- عدم شرب الشاي بعد الاكل لانه يسبب عسر هضم : طبعا معلومة ان الشاي الاخضر ما ينحف صحيحة طبعا لان مافي اكل او شرب ينحف , لكن اذا شربناه قبل الرياضة يسرع الايض وراح اتكلم عن هذا بعد شوي . الشاي عالاقل بعد ساعة
- عدم الشعور بالذنب بعد التخبيص , مثلا قطعة حلى ما راح تزيدنا كيلو الا اذا كنا مسوين ريجيم قاسي , والنفسية مهمة يعني اذا زعلنا عشان خربطنا راح يتخزن على شكل دهن
- نشغل نفسنا عن الاكل لما نمل او نكون قاعدين نشوف التلفزيون

هذا اللي فكرت فيه حاليا , بالنسبة للتغذية طبعا , لكن الاكل مو الشيء الوحيد المهم :
- النوم : احنا ناكل صح ونسوي رياضة ليش؟ عشان وقت ما احنا نايمين جسمنا يضبط نفسه , عشان كذا لازم ننام من 7 الى 9 ساعات مو اقل ومو اكثر طبعا ما نسهر , يعني ايش نسهر؟ مو معناها نصحى للصباح , معناها ان احنا نتعب ومع ذلك ما ننام , خلاص اللي يتعب ينام عشان ما يتعب الجسم

- الماء : الماء هو من الاشياء المهمة , لازم لترين يوميا , وموزع طول اليوم مو في ساعة وحدة نشرب لترين وتنفجر المعدة خخخخخ


الريااااضضةة :
اكل صحة بدون رياضة = خسارة وزن
اكل صحي مع الرياضة = خسارة دهون

تبون وزنكم ينقص عالميزان وجلدكم مترهل ولا تبون جسم حلو بدون دهون زايدة؟

نظام الرياضة تكون ست او خمس ايام بالاسبوع ويوم راحة ضرورة
الرياضة بعد الاكل , اللي يقول احسن على الجوع هذا غلط
يعني تخيل ان تحاول تشغل سيارة بدون بانزين؟ نفس الشيء الجسم يحتاج الطاقة عشان يتحرك

متى ناكل قبل وبعد الرياضة؟
قبل الرياضة :
اذا اكلنا وجبة نشوية : خبز ارز مكرونة (هنا ننتظر ساعتين)
اذا اكلنا وجبة فيها بروتين بعد : لحوم مثلا (ثلاث ساعات)
اذا اكلنا فاكهة او وجبة خفيفة مثل نصف سندويش جبن صغير (نصف ساعة)

بعد الرياضة :
بعد الرياضة مباشرة ضروري جدا نشرب ماء
وبعد ربع ساعة الى ساعة ناكل شيء يعوض الطاقة اللي راحت
انا اكل تفاحة مثلا

الرياضة كيف؟
نبدأ بالتمارين , وكل فترة ننوعها ما نضل كل يوم على نفس التمارين
تمارين بطن تمارين افخاذ ارداف زنود ظهر خواصر . ربع ساعة عالاقل
نبدأ بالتمارين السهلة لين نتعود ونسوي اصعب منهم

بعدين مشي مثلا
لازم نص ساعة او فوق
ليش؟ اول نص ساعة من الرياضة الجسم يحرق سكر مو دهون
اللي ماعندها جهاز عادي , انا امشي بالبيت ادور بالسماعات باذني ولا احس بالوقت , احسن من الجهاز الممل

بعد المشي نص ساعة وفوق هنا نجي للكارديو الاصعب شوي
كارديو يعني تمرين هوائي اللي يرفع نبض القلب
يعني بعد مشي نص ساعة او اكثر نسوي تمرين يحرق دهن اكثر
مثلا الرقص او الزومبا , تمارين كارديو , تمارين الخمسة ميل موجودة باليوتيوب
وكذا

بالنسبة للبنات اللي يخافون من العضلات
اول شيء البنت ما عندها الهرمون الرئيسي لبناء العضل
ثاني شيء البنات اللي بالانستقرام اللي عضلاتهم كبيرة هذيلو ياخذون ابر وهرمونات ويشترون بروتين ويحملون اثقال عشرة كيلو
ثالثا البنت عضلاتها غالبا تحت العظم ومو واضحة

اذا ما تبين وش نستفيد طيب؟
الجواب : العضلات تخلي جسمك يحرق حتى وانتي جالسة بدون شغل
العضل يحرق ثلاث اضعاف اللي يحرقه الدهن

وش الفايدة من كل هذا ؟
حياة صحية باذن الله
ما احدد لكم وش تاكلون ولا شيء
انما نصائح بسيطة تتبعوها وترتاحون
والنظام الصحي شيء نتبعه طول العمر
الناس تفكر نظام صحي معناها انا ما اكل حلويات وحارمة نفسي من الاكل الحلو
غلط , انا اكل اللي احب لكن انتبه للكمية , يعني بدل ما ناكل علبة شكلاتة ناخذ قطعة . ترا كلهم نفس الطعم

اهم خطوة ان الصحة اولا
الصبر ثانيا
الارادة ثالثا

نبدا من الحين ما نقول بكرا , كذا مستحيل نبدا
والاهم نقتنع ولا نغصب روحنا

انا الحمد لله هذا نظامي وفي اشياء يمكن نسيت اقولها
والحين انا مو ملاحظة اني نحفت لاني كل يوم قدام المراية فطبيعي ما بنتبه
اما الناس اللي يشوفوني قليل يقولون لي نحفانة
يعني اقدر ثلاثين شخص يقولون لي نحفتي
واللي يثبت لي اني نحفت هو مقاساتي اللي تغيرت وصرت البس مقاس M

اذا الوزن ثبت وصار ما ينزل معناها ان الجسم يحرق دهن ويبني عضلات
كيف نتأكد ؟
بالمقياس , سجلي قياساتك كل شهر

ولا نستعجل الوزن لان اللي يروح بسرعة يرجع بسرعة

ان شاء الله يفيدكم