~: : :OoO «-.¸¸,.-~*تجمع أحلى صحبه ,,,بنات ليبيا "التجمع الثانى" *~-.,¸¸.-..OoO: : :~

:26: وانت بخير تسلمي يا رب:26:

السلام عليكم ورحمة الله وبركاتة

كيف حالكم يابنات شنو اخباركم والله لكم وحشه عارفه نفسي مقصره معاكم غير انتوا عارفين مشاغل الحياه وديما انتوا في البال .

ام محمد
ربي كريم ورحيم حبيبتي ,ان شاء الله ربي يحفظك لي عيالك وزوجك والبيبي يتربه في عجزكم ياقدر ياكريم

بنات كلم كيف حالكم .ما شاء الله ان شاء الله ديما ملتمين على الخير

ام محمد شوفي الحلويات هذي انا كنت نزلتهم من فتره




بسكوت السله بالكورن فلكس
المقادير
كوب زبده
بيضه
نصف كوب سكر ناعم
ملعقه صغيرهB.P
فانيليا
دقيق حسب العجينه


طريقة العجن
تخفق الزبده مع السكر الناعم جيدا ,ويستمر الخفق مع اضافة البيضه , فانليا وبعدها يضاف الدقيق و B.P
الى ان تتمسك العجينه
الحشو
كورن فلكس
شكولاتة طبخ سايحه
لوز مهرمش
الطريقه الحشو
يتم خلط جميع المكونات مع بعض
ولاحظه يجب تسيح الشكولاته على حمام مائي
تحشى السله بي الحشوه السابقه تحضيرها, ثم تتدخل الثلاجه
الي ان تجمد وبعدها تشكل بخطوط بالشكولاته البيضاء





الكعيكه الجلجلان (السمسم) المعسله

المقادير
كوب زبده
كوب سمن
كوب حليب علب مثل رينبو او حليب كورنيشن
ملعفه صغيرB.P
فانيليا
دقيق على حسب العجنه
شيره لتعسيل العكك
للتزين الوجه
حليب
سمسم
الطريقة

يتم خفق الزبده والسمن وبعدها اضافه الحليب مع الخفق المستمر بعد ذلك يتم اضافة الدقيق ملعفه صغيرB.P الي ان تتكون عجينه يسهل تشكيلها.


يتم تشكيل العكك كما في الصوره ونقشه بالمنقاش





وفي عندي حاجات تاني غير نزلت هذين على السريع وان شاء الله يعجبنك توه في الليل انلحق التانيات
سلامي للجميع بدون استناء

السلام عليكم ورحمة الله وبركاته
صبحكن الله بالخير
كيف حالكن اليوم ؟
حفظتن المرسلات وألا كسلانات ؟؟؟

ليبيه 100%


الله ايسلمك ياغاليه وشكرا على الدعوات الحلوه
حتى انا انحب الرشده لولا سريبها مرات اندير كميه وانبوخها وانحطها فى الفريز لكن توا انحس فى روحى ما عنديش جهد للماكينه
والرز المبوخ حشا النعمه انا ما انحباش
لكن الكسكسو المكرونه المبوخه هذين فى بالى شكلى انرسى على وحده منهن

فكرتينى بأيام التصييف فى بنغازى الله كنا انعسكروا بالشهر فى بحر بوفاخره نحن وعيت عمامى ونمشوا فى الصبح للعمل وانروحوا على البحر وامدايرين مخيم كامل بماتوريات الضى ودايرين حبيله (شبردق )حوالين خيمنا ونروحوا من البحر زى الفحمه نين نلمعوا محروقين بس روعه روعه روعه .
خصوصا لما اتنوضى الصبح بدرى وتنزلى للميه وما فيه حد فى البحر ألا طيور النورس وألا اتشوفى قوارب الصيد من بعيد (ايام لا تُنسى)
وفى الليل اشوايات على الشط وبعدها تمسحى كبدك بجلوف الدلاع المسقع (يم يم)
نايضه نشهى اليوم,,,,
وصحيتى على المساعده كأنك عاونتينى

انجيمه

الله يسلمك ويفرح قلبك أن شاء الله ويبارك فيك ان شاء الله
العقبه لكل من يتنى ولا يحرم منه ابنيه .


عيونى
شنو حالك اليوم ؟



الغدا حتى انا قلت هكى كسكسو والا مكرونه امبوخه
وفكرت يا اما امبطن او طاجين جبن شكله الطاجين احسن من قلى البطاطا واسهل توا انشوف
والمصير يا حنا نحن امصيرنا ديما واتى بس اندير فى طريقتكم مش امصير الشرق .
ومع الشوايات الطحينه والسلاطه المشويه هذين اساسيات بس العيال الصغار هم العقده شنو ياكلوا
السلاطه المشويه لانها حاره ما ياكلوهش وبعدين فيها تغميس مايعرفوش ايغمسوا يبوا هكى حاجه اتشبع
البطاطا المبهره قصدك هذه اللى تسلقيها وبعدين اديريلها تتبيله واتحطى عليها جبنه وفى الكوشه والا حاجه ثانيه ؟
ونرجى فى الحلويات خخخخخخ

غاده
ربى يشغلك فى طاعته ياحنا


الله يسلمك والعقبه ما نفرحوا بيك يوم عرسك وأن شاء الله كل شيئ على البركه .

امل

الله يسلمك ويبارك فيك أن شاء الله
وشكله الكسكسو حبيب الكل وسريع فعلاً لو تبى اديرى امعاه كم شكل ثانى واتضمى وتستعدى للضيوف
والشربه صح روعه لكن ياكلوها ويسيبوا الحاجات الثانيه(الماكله الغليظه)
والبيتزا حتى هى اعتمدتها خلاص بأذن الله انديرها

حياة الحلوه

الله يسلمك ياغاليه وربى يفرحنا بيك حتى انتِ
وشكرا على عرض المساعده كأنك جيتى
ياريتك اقريبه يا حنا لو كان هذا ما نطلب من اعز منك
والوصفات نعرفهن بس مازال ما استقريت على انواع السلطات (انقول سلاطه مشويه وطحينه حوش وتبوله هذين ان شاء الله انديرهن ومعاهن البيتزا وتوا انشوف شنو اخرى امعاهن)

ذات الهمه


الله يبارك فيك يا احبيبه ويفرح قلبك بقرة عين ويجعلها ذريه صالحه عاجلا غير اجل
والله ديما فى بالى وحاسه بشعورك(وخجلانه منك) ان شاء الله ربى يرزقك بالولد الصالح عما قريب
وديما ادعى ربى لا تذرنى فرداً وأنت خير الوارثين
ربى ما ينسى حد وفضله واسع وهو الكريم فى عطائه ويرزقك من غير ما تحتسبى توكلى عليه وتيقنى انه حيستجيب
اهم شيئ لا تقنطى من رحمته وكرمه وابعدى عنك وساوس الشيطان
وان شاء الله ربك يفك سحرك
بس ما اتخليش حكاية السحر اتسيطر على تفكيرك واتخليك تعتقدى انها السبب فى ضيقك وتأخر حملك
نبى انقولك ليش ما تمشى لأخصائى نفسى
يمكن سبب الضيق يكون حاله نفسيه تمرى بيها بسبب تأخر الانجاب
امشى وما اتقوليش لحد(بسبب عقلية الناس فى مجتمعنا) حتى الفضفضه اتريحك
حنجيبلك اسم اخصائى ممتاز غير نسأل زوجى
والطب دواء وسبب من الاسباب
وبأذن الله اتفرحينا قريب

ليبيا قلبى



الله يسلمك ياغاليه ويفرحك ونفرحوا بيك حتى نحن ,,,
وتسلمى على طريقة الحلويات أن شاء الله السله انديرها عجبتنى على الاخر
بس نبى نعرف شنو نوع الشوكولاته (امتاع الكيلو قصدك )
تسلم ايديك ماشاء الله تبارك الرحمن
اليوم نبى اندير معمول بالحلقوم
امس لقيت حلقوم فى محل عربى وان شاء الله اليوم انديره وانصوره لكن ولو عندى وقت اندير امعاه حاجه ثانيه
وربى يعاون ان شاء الله

باقى البنات شنو اخباركن ووينكن اليوم غاطسات ؟

السلام عليكم ورحمة الله وبركاته
اخواتى فى الداخل والخارج كيف حالكم جميعا ان شاء الله كلكم بخير
ليبيا قلبى ما شاء الله غاب او جاب ،، طريقة تقديمك رائعه او ذوقك حلو ،، او بارك الله فيك حتى نا اندور فيها طريقة السليلة وان شاء الله تكونى بخير

ام محمد كيف حالك والف مبروك عليك الحمل نسأل الله ان يثبته وينبته نباتا حسنا ،، والله اول ما قريت عن رحلة علاجك اللى فاتت اول ما خطر فى بالى تاثير العلاج على المبايض --- لكن سبحان الله ربى رحمته واسعة ،رب كريم يا ام محمد،،،، او توة حسيت بصعوبة الظروف الأخيرة اللى مريتى بيها --- حمل وشك بالكانسر صراحة الحمد لله اللى صبرك ويسر لك الثبات وان شاء الله هذا هو حد السو وحفظك الله لعويلتك او زوجك ولكل اللى يحبوك
اما عنى فانا من خريجى كلية الطب بطرابلس ، اقامتى واسرتى من زمان فيها فتحت عيونى فى طرابلس او هلى او ناسى فى منهم فى طرابلس او فى منهم فى بنغازى والاغلبيه فى درنه ،،لكن عندى بنات عماتى من خريجات كلية الطب بنغازى 4 دكتورات
المهم انا لما جيت الامارات حاولت نخدم نساء وولادة لكن كان لازم يكون عندى الفرست بارت ، فخشيت MRCOG -الزماله البريطانيه للنساء والتوليد-او ما صار شى من المحاوله الاولى ،لهيت بالعيال او معش دورت الخدمه ،،، وصراحة صعب جداا التوفيق بين العمل كطبيبه وبين البيت،، عندى اختى اتجهز للسكند بارت نساء اوتوليد وصراحه متعذبه بين الشغل والقرايه والحوش والعيال ،،لولا تيسير الله لها او مساعدة زوجها اللى يساعد فيها مساعدة كبيرة ،، ما كانتش تقدر تستمر فى تحظيرها للسكند بارت
المهم لما اتروحى لطرابلس نهائى ان شاءالله اتلاقينى اختك اترجى فيك ان شاءالله وبالك نطلعوا جيران (حتى انا انجهزوا فى السكن امتاعنا فى حوازة او زوجى من طرابلس)
بالنسبه للشوى بارك الله فيهم خواتنا ما قصروا وعطوك خيارات واسعه للسلاطات ،، والاطفال ديما يحبو الشقاشق ،، واللى خاطر على بالى توة هوا خبزة التوست تفرديها وتدهنيها بالمايونيز او تحشيها وتلفيها زى السويسرول او تدهنيها بزيدة تكونى امسيحتيها-ضرورى تدهنيها بالزبدة- وتخبزيها فى الفرن ،، احسن من طريقة القلى ، واسهل حشوة تقلى بصل وتحطى عليه جزر مبشور او كان عندك كرنب ورق حتى هوا مقصوص رقيق - لكن انا غالبا اندير الجزر بس- اتخليه يذبل شوى وتبليه بشوية ملح وفلفل اسود او كمون حوت ،، حشوة ساهلة وسريعه وممكن اتجهزى السنويشات قبلها بمدة وتحطيهم فى الفريز وتطلعيهم اشوى بعدين تخبزيهم ،، ساهله ولذيذه
ولتانى يوم تهيالى مع العصبان الرز لا يعلى عليه ،، والشقاشق زى ما قالولك البنات طاجين جبن ويللى هوا خظراوات مع لحم وبيض - اكيد تعرفيه - ، او عندك حتى عجينة البف او حتى الجلاش تحشيهم وتحطيهم فى الفريز او لما تبيهم طلعى واخبزى - حتى لو كانوا حاجات قديمه لكن ديما مرغوبه -
والحلو اصابع اللاه ساهلات او سريعات يشبهو لطريقة ليبيا قلبى لكعك السمسم،، لكن طريقتى ما زال اسهل : كوب زبدة ، كوب زيت ، ربع كوب عطر او زهر، كوب جلجلان امحمص ، بيكنج باودر وما يعجن دقيق واتشكليهم اصابع او زى الغريبه وبعد الخبز تسقيهم عسل او شربات حاطة معاهم شوية عطر او زهر وتغمسيهم بجوز الهند ، ساهله وسريعه وتعطى كميه كويسه
وان شاء الله ديما حوشك عامر او نعمتك دايمه وربى يباركلك فى جهدك ووقتك ويسترك مع ضيوفك

ام محمد كيف حالك ،، رانى فاتحة النت لى ساعتين توة ونكتب فى الرد او كل ساعه وشوى نايضه انشوف فى العيال او عشيتهم او توة جيت قعمزت وكملت الرد وبعته القيتك خاشه ،، موش عارفه يوصل فيك اليوم ولا لا ؟! :) ان شاء الله تكونى بخير وربى يعاونك

اختى ذات الهمه----كيف حالك انت وزوجك ان شاء الله تكونوا بخير ،، والله تأثرت جداا بقصتك وان شاءالله ربى يفرج عليك ويفرح قلبك باللى تحبى عاجلا غير آجل
لكن يا اختى نبى انقوللك مع العلاج بالرقيه الشرعيه عليك بأخذ الاسباب الدنيويه ، وأكيد انت عارفة وامدايرة كشوفات انت وزوجك ،، بس حبيت انقوللك ما فيش داعى الواحد يخسر وقت اتجهى لدكاترة متخصصين فى العقم موش بس امتاعين نساء وتوليد ، لأنه زى ما تعرفى فيه تخصص داخل التخصص ، وعندك الدكتور الخافى فى طرابلس متخصص فى العقم ومستواه ممتاز ، ودكتور المحيشى فى مصراته-نار على علم-وعنده اجهزة دقيقه لمتابعة التبويض او ما يفوتش اى مؤتمر عالمى فى تخصصه-حسب علمى- امشيله انت وراجلك اوراهو الحجز عنده بالشهور لكن معليش الواحد ما يضيعش وقت تانى -او مصراته فيها فندق جوز التيك محترم للاقامه-
انقوللك هكى للأنى شفت حاله سنين امسيبه الكشوفات وتعالج من السحر عشان العيال او بعدين كشوفاتها اللى دارتهم فى المانيا كشفوا ان السبب جراحى وبسيط او كان ممكن تتفادى التأخير لو خذت بالاسباب بالشكل الصحيح ،، نسأل الله ان يسمعنا عنك كل خير وينولك الذريه الصالحه عاجلا غير آجل ياااااااااااارب