توني متهاوشة مع زوجي ومدري هل انا على حق او لا ؟؟ ساعدووني
السلام عليكم ورحمة الله وبركاته
تراني مستئذنة من الأخت مايا لكتابة مشكلتي
<< بنت خالها
انا متزوجة والحمد لله وعندي بنوتة صغنونة عمرها سنة
قبل شوي تهاوشت مع زوجي على السرير ونفسيتي تعبت من الكلام الفاضي
وقمت اكتب لكم وابيكم تساااااااااعدوني
انا موظفة وراتبي والحمد لله ممتاز ومن عائلة مرتاحة ماديا وزوجي راتبه اقل مني ولكن عنده دخل آخر واغلب الدخل رايح على ديونه الخارجية منها لمحله ومنها ديون زواجه اللي استلفها ومن عائلة اقل من المتوسط
يعني باختصار اهله على قد حااااااااالهم
المهم قبل كم يوم جاني يقول ابحول لاهلي 3000 ريال لانهم محتاجين وطلبوني
قلت له ايه ليش لا حول لهم
اهله حالتهم المادية قليلة وابوهم متوفي من مدة طويلة عنده اخ اكبر منه مدرس وعليه قسط سيارة وقرض البنك يسدد فيه ويدفع ايجار بيتهم ومصاريف اخوانه
وعندهم اخ كبيرر توه متوظف براتب 1700 اعتقد مع انه جامعي بس مالقى غيرها بمدينة ثانية
والمدرس... امه واخته اللي متخرجة من الثانوي واخوهم الاخير اللي بالثانوي عايشين معه بمدينة غير الرياض
المهم ............
بعد يومين قال لي تراني حولت لهم 6500 ريال بصراحة ذهلت قلت له بس ترى حتى بعد حنا محتاجين كان حولت لهم الحين 3000 والشهر الجاي 3000 لاننا حتى حنا بصراحة مزنوقين
قال وش اسوي كل شوي يدقون علي وهذولي اهلي فسكت وماقلت شيء
قبل شوي على السرير سالته
عسى ماشر كنت تكلم اهلك بعصبية
قال لا بس اختي قهرتني قلت له ليش ؟ الحمد لله امورها زينة وزين قبلوها بالجامعة مع ان نسبتها ضعيفة بالثانوي
قال ايه انتساب وش تبي تقعد في بيتها احسن ........ المهم من هالكلام
قال لي اصلا انا حولت لهم 2300 دفعة اولى عشان تسجل في دبلوم الحاسب الالي عشان تلقى وظيفة
وكل شهر ابحول لهم 800 ريال رسوم الدورة لمدة سنتين
وقعدت البنت في البيت من غير شغلة او دراسة مو زينة ابيها تستفيد وتنفع نفسها
بصراحة يابنات انا هنا مت من القهر
قلت له معليش حبيبي بس ترانا حنا اولى
قام عصب وقال انتي وش ناقصك ؟ مرتاحة وكل شيء عندك فيه غيرك فيه غيرك محتاجين
عاد انا ارتفع ضغطي وقلت له كل مااقول لك شيء تقول مرتاحة وعندك
انت متزوجني عشاني موظفة والا وش سالفتك ؟ كل شوي تقول مرتاحة وراتبك عندك
معليش 800 هذه انا وبنتك احق منها اقلها يااخي مصاريف بيتك
الي ثلاثة ارباعها اشتريها من جيبي الخاص
يااخي حتى بنتك ماعمرك شريت لها ذهب تلبسه لغاية ماوصلت لعمر سنة ماعمري ذكرت
انك شريت لها اسورة او سلسال تلبسه وكل شوي تقول انا علي ديون وعلي ديون
بس ماراح يجي العيد هذا الا وانا شاري لهاا
واختك ماراح تاثر على ديونك هذه ؟؟
المهم تهاوشنا وقال خلاص قفلي على المووضوع
وبصرراحة انا ماعرفت اناااااااام والله من القهر كان ودي اتهاوش
بالله عليكم انا غلطانة ؟؟؟؟
اوكي اخته مااختلفنا واهله مااختلفنا وهم محتاجين ماديا بس عاد مو لدرجة الاستغلال
وناسين انه متزوج وعنده زوجة وبنت والا هم بعد يقولون موظفة وتستلم خليها تصرف من جيبها
والله يااااااابنات انقهرت وحسيت نفسي مغفلة
اغلب مقاضي البيت واشياء بنتي ولبسي من جيبي وحتى بعض اغراضه انا اشريها له
واعطيته كثيررر من راتبي لما يحتاج وهو حبيب كثيرر معنا لكن دائما اسمع العبارة المشروخة انا عندي ديووووووون ........ صح عندك ديوون بس لما اهلك يتصلون ويقولون ارسل على طوووول ترسل ماعمرك قلت لهم ماعندي والا على ديون وانا كل مااقول شي تقول اصبري انتي مو محتاجة
هو مايقصر انا كان عنده بس عااد مو دائما .. دائما انا علي ديوون
لكن بالنهاية صدمني
مو معنى اني موظفة والا اهلي مرتاحين انه يترك اغلب مسؤلياته
انا اساعده من باب انه زوجي ومديون لكن اتفاجا بخبر دراسة اخته وانه بيتكفل بمصاريفها
مع اني قبل فترة قلت له السواق اللي يوصلني بياخذ 800 او اكثر قال ايه مو مشكلة ادفعي له
والشغالة اللي عندي الله يخليه ابوي متكفل فيها من والى
بالله يااااااابنات تكفون ساعدوني
صح زوجي يداري خاطري ويقدرني ويحبني ويخاف على زعلي بس احس انه مدري استغلالي او انا فاهمة غلط ............
اهله ايه بس حتى انا زوجته وفيه بنته والا ليش متزوج ؟ يقول انتي وقفي معي
وكل كم يوم يقول قرفت من الديون وش اسووووووووووووووي؟؟
وش يعني الزوجة توقف مع زوجهاااااااااااا وهو مديون ؟ معقولة لهالدرجة ؟ والا كيف
انا والله مو مقصرة وهو بعض الاحيان مايقصر بس اغلب الوقت انا اللي اصرف وهذا يقهرني
ويحسسني بضغط نفسي رهيب
من جهة ماودي اثقل عليه بمصاريفنا واقول زوجي ولازم ااساعده ومن جهة اقول لا مو دائما صاير اغلب شيء انا اللي ادفع ماااااااااااااااااصارت
وش رايكم ؟؟ كيف اساعده والا انا مو غلطانة