من عينيا الاتنين
الشاورما على طريقه الشيف شربينى :
تجيبى اللحم (لحم بتلو بس انا باستعمل الفلتو) وتقطعيها حتت طوليه ومش رفيعه اوى وتحطى عليها ملح فلفل شطه زعتر توم بصل (هو قال ميه البصله بس انا حطيت البصله كلها لان مكانش ليها ميه كتير وكانت مفرومه اوى فامكانتش حتبان) وتحطى صلصله طماطم (ممكن تضربى الطمطمايه والبصله مع بعض فى الكبه ) وبعدين تحطى شويه زيت وليمون واهم حاجه الخل وتنقعى اللحمه فى الخليط وفى التلاجه هو كان قايل 6 او 7 ساعات بس انا مكانش عندى وقت فسبته ساعتين بس لكن النتيجه كانت هايله وكمان علشان مكونتش حابه الخل يدى مزازه جامده فيها
وبعدين تحطيها على النار بالخليط على بعضها ومتقليبيش خاااااالص خااالص لحد ما تشرب ميتها وبعدين تقلبيها وتنشيفها شويه بس مش كتير يعنى
وتكونى مقطعه بصل وفلفل رومى وطماطم حتت صغيره بس مش اوى وتضيفهم على اللحمه وتقلبى بس متخليش الخضار يدبل وتطفى النار
انا عملت جنبها سلطه طحينه وبطاطس محمره وعملتها سندوتشات فرشت الساندوتش بالطحينه وحطيت الشاورما
وبالهنا والشفا
يارب مكونش رغيت كتير :(
ملف استشارة مطبخية مصرية عربية رمضانية
متابعة النقاش، صفحة 70