ملف استشارة مطبخية مصرية عربية رمضانية

السلام عليكم
ام مرام اللسان العصفور حمريه وشيليه في الفريزر وخودي منه على قد الطلب في ناس بتعمل كدا وتعبيه في علب بس انا ماجربتش
هوه بيسعف انا النهارده كنت محتاره اعمل ايه طلعته وحمرته وكان عندي شوربه شيلاها في الفريزر ولحمه معصجاها في الفريزر ضفت الشوربه على اللسان العصفور ولما اتسلق وشرب الشوربه كويس ضفت اللحمه المفرومه وعملت جمبها بفتيك والله يجازيها خير تادو جربت وصفتها حطيت عالبيض شوية زيت عشان طبقة البفتيك ماتفكش وفعلا ما فكتش معايا
الفول بتنقعيه عادي وتحطيه في البريستو مع الاضافات اللي بتتحطله بس بتحطيله مايه كتير شويه عشان ماينشفش واقفلي عليه ولما الحله تصفر واطي وتقريبا ممكن يقعد نصف ساعه او ساعه الا ربع مش فاكره من بدء تصفير الحله وممكن تفتحي عليها من غير ماتستني ما البخار يطلع حطيها تحت الحنفيه هاتلاقيها فاضت البخار افتحيها وشوفي لو لسا حطي عالنار تاني
الحمص بتنقعيه قبلها بيوم وتسلقيه في مايه وتواطي عليه لما يغلي هوه بياخود وقت شويه لو في البريستو يبقى اسرع
ام كريم ما شاء الله ايه الشطاره دي

صباح الخير
بالنسبة للبفتيك يا جماعة انا كنت قلتلكو معلومة سمعتها من الشيف شربينى عشان ميفكش
قال انه بيتبلها بملح وفلفل طماطم مبشورة ومية بصل ويحطها فى الثلاجة شويه تشرب التتبيلة وبعدين يطلعها يحطها فى دقيق وبعدين بيض وبعدين بقسماط وعشان متفكش وهو بيحمرها قال الزيت ميكونش مغطى اللحمة لانه لو غطاها الطبقة اللى فوق هتفك وتقلبيهاش كتير فى الزيت يعنى اقلبيها مرة او مرتين بس

ام كريم فعلا الطماطم بتفرق عن الصلصة فى الطبيخ والثوم مبيتحطش غير للباميا والملوخية بس لما بيتحط فى الطبيخ العادى التانى بحسه زى ما بيقولو طبيخ غامق

التفاصيل لو سمحتي :angry::angry: يأما تتكلمي عربي :mad:

تسلم ايديكى يا ام كريم على المعجنات و على فكره الفاصوليه الخضره كمان بيتحطلها توم و بعدين ولا يهمك ما كلنا ماكناش بنعرف نطبخ و مازلنا فى حاجات مش بنعرفها عادى يعنى هو إحنا اتولدنا فى ايدينا الكبشه ولابسين مريله المطبخ؟