السلاام عليكم ورحمة الله وبركاته
ازيكو يا بنات اخباركوا ايه
الف الف سلامه عليك يا ابله دينا ان شالله اللي يكرهك
ربنا يقومك بالسلامه ويخفف عنك يارب
شوفي يا ستي
هانقشر القلقاس و نقطعه مكعبات صغيره وبعدين ننقعه في ميه لمدة ساعه
ثم نغسله كويس اوي تحت الميه مع الدعك الجيد علشان نتخلص من
كل المزلقه اللي بتبقي فيه
بعد كده بنحتاج : كميه من المرقه + رأس ثوم مقشره وحزمتين كسبره خضراء +
ملعقتين كبار سمنه
نغسل الكسبره كويس ويفضل انها تكون من النوع اللي عيدانه طرية وصغيره
( والا هاتضطري انك تقطفي الورق وتستعمليه هو وترمي العيدان )
اغسليها وسبيها تنشف من مية الغسيل شويه وبعدين افرميها خشنه
او قطعيها قطع صغيره بالسكينه
قشري راس الثوم وافرميها نص فرم
نحط الكسبره وملعقتين السمنه علي النار لحد ما تبدأ تدخل في التحمير وتنشف
، وقتها نحط الثوم ونفضل نقلب لحد ما الثوم والكسبره يتحمروا ( بس اوعي تتحرق منك )
بعد كده تصفي السمنه وتسيبي الكسبره والثوم يبردوا وبعدها تفرميهم
هم في المفرمه كويس اوي او تدقيهم بايد الهون
بعد غسل القلقاس نغلي المرقه ونحطه فيها يفضل يغلي لحد مايستوي ومش هاياخد اكتر من عشر دقايق لو نوعه كويس
قرب مايستوي بنضيف عليه ملعقتين السمنه اللي احنا صفيناها من خلطة الكسبره
وبعدين نضيف الكسبره والثوم اللي فرمناهم
يادوب يغلي كمان غلوتين نغطيه ونطفي النار ونسيبه متغطي شويه
وكلي احلي قلقاس بالهنا والشفا
ممكن تفرزني القلقاس بعد ماتغسليه كويس وتصفيه من الميه تحطيه في كيس نايلون وتحطيه في الفريزر
وكمان ممكن تعملي خلطة الكسبره والثوم وبرضو تحطيهم في كيس صغير مع كيس القلقاس في الفريزر
وكل اللي عليكي انك لما تحبي تطبخيه تغلي المرقه وتحطي عليها القلقاس
وقرب مايستوي تفرمي الخلطه بتاع الكسبره وتحطيها عليه
بتبقي سهله جدا وخصوصا لو هاتعمليها في رمضان بتوفر وقت كبير
وفيه طريقة تانيه للقلقاس بالدمعه بس انا مش باحبها وهي مش طعمه زي اللي بالخضره
هاتقشري القلقاس عادي وتقطعيه حلقات زي ما بنقطع البطاطس لصينية البطاطس
، وتنقعيه في ماء لمدة ساعه وبعدين تغسليه كويس اوي لحد ما ملمس المزلقه
اللي فيه دي تروح
وبعد كده ينطبخ زي صينية البطاطس عادي خالص
عصير طماطم + 5فصوص ثوم كبيره + بصله متوسطه مفريه
تفرمي الثوم وتضيفيه للبصل وعليهم الملح والفلفل والبهارات اللي تحبيها
وبعدين تحطي حلقات القلقاس وتقلبيهم وبعد كده عصير الطماطم وتزودي كوب مرقه
وتحطيهم علي النار لحد ما تتسبك ويستوي القلقاس
ملف استشارة مطبخية مصرية عربية رمضانية
متابعة النقاش، صفحة 311