الغريب ياعزيزتي ..
انك تتكلمين عن بنتك كأنها امرأة في عمرك... تقوليها اهوشها ومن بكرة تجي من المدرسة وتسولف وتنسى اللي صار .. وانها ماتجي تسولف الا معك انتي وتلحقك ((وانتي ماتعطينها وجه))
لحظة لو سمحتي ..
انتي تتكلمين عن بنتك !!!
وبنتك عمرها 12 سنة !!!
يعني طفلة !!!
اكيد الطفل بينسى .. مافي بقلبه حقد وكره زي الكبير .. وخاصة على امها ..
اكيد بتلحقك .. لأنك حاقرتها .. ومفرقه بالمعاملة بينها وبين اخوانها ..
اختي العزيزة ..
تدرين ان بنتك في اخطر مرحلة عمرية اللحين ..
تدرين ان التبول اسبابة نفسية ؟؟
هل انتي متخيلة الدمار اللي بقلب هالبنت .. اللي يخليها هاجرة الدنيا .. واللعب
والطلعات .. ؟؟
حبيبتي .. انتي تسألين .. هل انا فيني بلاء ؟
انا آسفة بس انتي فعلاً تحتاجين مساعدة .. تربوية نفسية ..
الجأي للمختصين .. بعلم النفس وعلم التربية ..
ارجوك .. اسرعي
قبل ما تدمرين حياة طفلة كل ذنبها انها بنتك .. وانك لا تعلمين ليش ماتحبينها ؟
فكري ليش انتي كذا ؟ هل امك كانت قاسية معاك ؟ عندك مشاكل في طفولتك ؟ هل حملتي فيها غصب عليك .. او اول ماتزوجتي وحسيتي انها سلبتك حريتك وحياتك وشهور العسل ؟؟
بس انا احييك .. انك انتي اعترفتي ..انك لا تعلمين اين الخلل .. وانك تشكين بنفسك وهذا اول العلاج ..
سارعي حبيبتي لطلب المساعدة .. ارجوك ..
ليس فقط من اجلك .. بل من اجل بنتك حبيبتك .. فكري لو لاسمح الله فقدتيها بحادث سيارة او بمرض لعين ( لاقدر الله ) ايش كنتي بتقولين لها في قلبك ؟
سامحيني ؟
تراي احبك ؟
سارعي وقولي هالكلمات .. قبل ما تفقدين بنتك .. وجدانياً ..
صارحيها .. اطلعي معها لحالكم.. روحو مطعم حديقة .. قوليلها انا احبك ..
انتي اغلى شي عندي بهالدنيا .. قوليلها كيف فرحتي يوم عرفتي انك حامل فيها
قوليلها يوم ولادتك فيها .. قوليلها عن اول لحظة طلعت من بطنك .. كيف كان شعورك ..
راح تفهم .. وبتحس انك أم .. ولك مشاعر ..
قوليلها حبيبتي ترى مو ذنبك لو صرخت عليك او عصبت ..
بس ترى انا عندي شوي مشاكل ما اعرف اتحكم بنفسي .. ساعديني ممكن ؟
بتقولك شلون ؟؟ قولي بتساعديني .. لو مازعلتي مني .. وكل مرة ازعلك .. قولي في نفسك .. امي تحبني .. وهي زعلانه من نفسها عشان كذا صرخت علي .. مب انا السبب ...
فهميها .. وصليلها حبك ..
ماراح تسمعك وهو نايمة ..
امسكي ادينها وهو صاحية .. تغزلي بعيونها .. امدحيها ..
وايضا .. لازم تبلغين زوجك .. وبجدية .. يعني مب سواليف حريم .. ترا اليوم زعلت عليها .. مدري وش جاني ..
تقولين له .. يافلان .. ترا انا احتاج مساعدتك .. ماني قادرة اسيطر على نفسي قدام البنت .. ابيك تهديني تنبهني .. عشان استوعب ..
وابحثي ياحبيبتي عن الخلل فيك انتي .. فهي طفلة .. ليس لها ذنب
آمانة عليك ما تزعلين ولا تاخذين بخاطرك ..
انا ما اعرفك ولا احقد عليك ولا اكرهك .. بل وبالله مارديت الا لمصلحة هذي الطفلة ..
وانا احس بمشاعرها ..
الحمدلله آمي ماعمرها فرقت بيني وبين احد من اخواني .. ولا عمرها غلطت علي ولا عمرها ظلمتني الله يطولي بعمرها ..
بس اللهم انها كانت من النوع اللي مايعبر على مشاعرة .. وهذا عشان امها كانت قاسية .. طبعا بعد ماكبرت استوعبت الاسباب .. لكن والله شهيد انها عمرها ما قصرت علي .. وعمرها ماحسستني بظلم ومع ذلك كنت احتاج كلمات الحب ..
والممديح .. والحنان .. والإحضان والتقبيل .. كنت احتاجهم .. بطفولتي واغار من البنات اللي امهم يسموون عليهم بالطالع والنازل .. ويحضنونهم ويقبلوونهم .. كنت أغار ..
والحمدلله اللحين بعد ماكبرت صرت افهم .. اني امي شخصيتها كذا .. لكن مايمنع ان قلبها كبير .. أمراض ورا امراض جتها من الكتمان والتحمل والصبر .. الله يحفظها .. اللحين عذرتها ..
بس انا كان عند امي اسبابها ..
انتي اشرحي لبنتك .. قبل ماتكبر والخوف انها ماتلقالك سبب ؟
محبتك في الله
بنتي يمكن انا اللي مرضتها ...والاحساس بالذنب قتلني..تكفون وش الحل؟؟/ قديم
متابعة النقاش، صفحة 24