اليوم سويت ع السحور فلافل وحبيت اشاركم الطريقه
اول شي نقعت الحمص الحب ليله كامله وفرمته مع بصله صغيره وفصين ثوم وكزبره خضرا وبهرتها بكمون وكزبره ناشفه وفلفل اسود وملح وبكنج بودر طبعا البكنج مااحطه الا قبل القلي وكورتها وحطيت عليها سمسم وقليتها بزيت حاار
وراح اقلكم طريقتي في البطاطس المقلي اهلي يطلبوه مني طلب يطلع مقرممش وقمييل اول شي اقطع البطاطس بالقطاعه واغسله واحطه بقدر فيه مويه وخل ورشة ملح بسييطه واغليه على النار ليين يغلي لما يغلي اقفل النار واخليه عشر دقايق وبعدين اصفيه و اغسله بمويه بارده واخليه ينشف من المويه واقلييه في زيت حاااار نااار لازم يكون الزيت مولع ماينفع زيت حرارته متوسطه ابد واخلي النار عااليه طول فترة القلي وممكن تفرزنيه وتطلعيه تخليه يفك وعلى القلايه على طوول برضو يطلع مزبووط
وخلاص سويت الفلافل والبطاطس دهنت الخبزه بجبنه سايله وحطيت فيها فلافل وبطاطس واذا حابين بيض اقراص احنا نسميه كذا مدري شتسموه😊 يعني تضربي البيضه بالشوكه وتملحيها وتحطيها على الصاج بدون تحريك تصير مثل القرص
واحط في السندوتش خيار وطماط مقطع وكتشب وشطه وبس وكلي احلى سندوتش فلافل من شغل ايديك
