شاركي في النقاش

سجلي الدخول لإضافة تعليق.

التعليقات

61
  1. @am_trky_2030

    انا الصراحه اشتري من حرمه يمنيه الكيلو ب70 تهبل حتى بعد ماتزوجت صاروا اهلي يشحنونها لي

    طبعا هي تحمص البن وتحط عليه مستكه وزعفران ونخوه وكل شئ فقط الهيل ماتحطه

    انا اطبخها ربع او نصف ساعه واحط في الترمس تبع الثلاجه ملعقتين صغار هيل\

    وماشاء الله قهوه رهيبه حتى كل من جاء يسالني عنها

    وزملاء زوجي اعجبتهم مره
  2. القهوه تعتمد بشكل كبير على حمستها ..

    وعندي قناعه القهوه مالها طريقه سريه .. لو حمستك مضبوطه قهوتك بتصير مضبوطه ..

    أنا أشتري القهوه محموسه ومطحونه وأخذ مقادر حاجتي منها ولا أكثر وأحطه في علبة القهوه والباقي في علبة وينحط في الفريزر عشان مايتغير..

    لأن القهوه إذا طولت وهي برى يروح طعمها ..

    بالإضافه سمعت كثير إن القهوه ماتصير مره مضبوطه لما تكون دلة القهوه اللي تطبخين فيها جديده أو مهجوره وقت طويل ..
    علشان كذا ممكن تلاحظين بعض الناس إذا شروا دلة قهوه حقت الطبخ وليس التقديم يصلحون فيها قهوه بس مو عشان يشربونها لا عشان يخلونها يمكن يوم كامل بس عشان تمسك الدله ريحة القهوه .. وأحيانا يطبخون فيها مسمار أو مثل مايسمونه بعض الناس عويدي أو قرنفل ..عشان يكون لنفس دلة القهوه ريحه ..

    القهوه مو على طول تفوح تسكرين عنها وتزلينها في دلتها ..

    لا خليها شوي تطبخ ..

    الخلطات اللي بين الناس اللي للقهوه هي خلطات من أجل لون القهوه ..

    الهيل لما تستخدمينه ماتخلينه مدة طويله مطحون يعني يجلس كم شهر مطحون اطحني على قد حاجتك ولا تكثرين .. لأنه مثل القهوه مع الوقت يفقد ريحته القويه وممكن بعد طعمه ..

    ___________

    أنا أقدر أشرح لك كيف اسوي قهوتي بس ماراح تستفيدين شي ,,

    لأن الحمسه من بيت لبيت تختلف ومكيال الحمسه يختلف إذا كانت الحمسه ثقيله ماتكثرين المكيال وتكثرين إذا صارت خفيفه ..

    يعني أنتي أبخص بحمسة قهوتك ..

    القهوه ياعمري كل ناس لهم ذوق فيها ..

    حنا حمستنا متوسطه وماهي ثقيله ونعتبر هالشي بينا إن هذا هو الأفضل ..

    لكن في المقابل هناك ناس تحصلينهم يموتون بالقهوه الثقيله وممكن تقعد تمدح لك فيها وتعلمك عليها لكن لو ذقتيها ما أعجبتك نظرا لاختلاف الأذواق ..هم عندهم إن هذا هو الأفضل لكن أنتي ممكن مايناسبك هالشي ..

    الزعفران يعطي ريحه حلوه للقهوه بس طبعا غالي وعني أنا ما أستخدم الزعفران إلا للضيوف ..

    المسمار مثل ما أهلي يسمونه أو القرنفل أو العويدي مثل مايسمونه البعض بعض الناس يحبونه وبعضهم مايتقبل القهوه اللي فيها مسمار .. بس في الغالب الرجال يهمهم هالشي لأنهم يعتبرون القهوه اللي مافيها مسمار مهب قهوه ومغير بربسه ..


    ما أنصحك أبد تسوين مثل مايسوون بعض الناس وهو إنك تحطين شوية حليب مع القهوه لأنه بنظري يفقد القهوه لونها الأصفر ويعطيها لون ثاني وممكن يكسبها طعم ..

    حاولت أحصر لك الأسباب اللي ممكن تؤدي لنجاح قهوتك ..
  3. @lyn_78

    هلا اختى انا اسوي قهوة وديما ثلاجتى تكون فاضية ريحة وطعم رهييييييييييب لا تقاوم زوجى يقول قهوتى تصحى السكران شكلى جالسة اقول قصة حياتى:hahaha::hahaha::35:
    اول شي احمص قهوة تكفى اسبوع واحطها بثلاجه واذا اشتهيت القهوة اطحنها طازج على طول هى والهيل يعنى فنجان قهوة بن وملعقة خلطة القصيم ورشه زعفران واغلي عشر دقايق وبعدين اطحن الهيل فنجان الا ربع مع اربع حبات مسمار واضيفة للقهوة واول ما تفور اطفى وحط بترمس وسلام:27::laugh2::laugh2::7_5_131:
  4. @bnto_lbaba

    احسن قهوه البريييييييييييييييييه

    انا احمسها ثقيله ومااطجن الا استخدام اسبوع بس واخلي المويه تغلي مع فنجال قهوه وملعقتين صغار خلطة القصيم وشووووووية حليب سايل نقطه وبالترمس ملعقتين هيل صغيرو وشوي عويدي

    وبيت عماني يحبون قهوتي مرااا وانا اللي احمسها في البيت
  5. @dmar_zogy

    اساس الطعم هو البن الجيد والهيل الاصلي


    واذا تبين ادلك على محل يبيع لك البن الجيد أو يوصله لك من عيوني بن ملكي طعمه رائع كيلو ب30


    أولا لازم القهوة تكون لها غلايه لوحدها ماتغلي بهالغلاية إلا القهوة


    وتاخذين ثلاجة القهوة وتحطين فيها ماء ثم تحطينه بالغلاية وترجعين تحطين ماء في الثلاجة لربع وترجعين تحطينه بالغلاية

    يعني الغلاية حطيتي فيها ماء بمقدار ثلاجة وربع

    بعدين خلي الماء يغلي اذا غلى الماء ( لازم يغلي ) حطي ملعقتين من البن الي قلت لك عليه واذا مو هو حطي فنجان قهوة من اي بن عندك
    وخليه يغلي 10 دقايق فقط لايكثر

    وحطي بالثلاجة ملعقتين هيل وملعقة كوفي ميت ثم صبي القهوة في الثلاجة واذا امتلت الثلاجة قهوة

    خذي ملعقة وشيلي شوي من الهيل الي على القهوة

    وشوفي بعدها كيف الطعم ....


    تقدرين تضيفين الي تبين على هالقهوة ممكن تضيفين زعفران أو نخوة أو اي شيء تبين ...

    لكن الثلاجة حقت القهوة اذا اضفتي لها بهارات القهوة تمسك الريحة ولاعاد تروح منها يعني ماعاد بتقدرين تسوين فيها قهوة هيل فقط بيصير فيها طعم

    خلي عندك ثلاجتين وحدة للهيل ووحدة للبهارات

تابعي تجارب أخرى من هذا القسم.