شاركي في النقاش

سجلي الدخول لإضافة تعليق.

التعليقات

2,001
  1. @noga_9

    صاحبة الموضوع
    كنت وعدتك يا ريهام هكلمك عن سميراميس
    والغزالة جتنى دلوقتى اكلمك عنها
  2. @noga_9

    صاحبة الموضوع
    شوفى يا ستى بالصلاه على النبى الحجة سميرة دى اختصار يعنى لاسمها الناس متلخبطة فيها ناس تقول اسطورة وناس تقول حقيقة
    وطبعا بما ان المزة لها اعمال تاريخيه مرتبطة بها طبقا يعنى لكلام الناس اللى بتقول انها حقيقة
    فنحكى قصتها من البداية لان اعمالها التاريخيه مرتبطة بالملك نينوس مؤسس نينوى بابل يعنى ويقال ان الحج نينوس ده ابن ابوه الحج نمرود طبعا اللى هو الملك بتاع سيدنا ابراهيم عليه السلام

    مولد الست سميرة دى فيه قصتين الاقرب للصح فيهم انها اتولدت فى عسقلان من ام سورية وللاسف ابوها غير شرعى مما استدعى امها انها تتركها فى الصحراء والتقطها راعى غلبان اسمه سميراميس خدها ورباها والبنت كبرت طلعت مزة مزة يعنى
    جمال وذكاء بيلفت النظر
    وفى يوم الراجل الحاكم ابو عين زايغة اللى اسمه منونيس بيتفقد احوال الرعيه عينه وقعت على المزة ادهول وحبها يا اختى
    وراح للراعى الغبلان وقاله اتجوزها والنبى يا عمى فطبعا الراعى ما صدق اهبل زى ده ولزق له البت على طول
    واتجوزت حاكم مدينة نينوى وبقت فى عز يا اختى عقبالك
    لا والانيل بقى انه كان زى الخاتم فى صباعها بالعربى بقى جوز الست

    المهم بقى الراس الكبيرة الملك نينوس يعنى كان بنى نينوى دى من 17 سنة وقرر بسلامته يضرب على كل المملكة المحيطة به يعنى راجل فاضى قالك اهو نجارب بدل ما انا قاعد زى النسوان فى البيت
    وكان معاه بقى عمك منونيس جوز الست سميرة
    المهم الراجل بعت جاب مراته الشوق يعنى كان قاتله وقالك اجيب المزة تقعد معايا شكل الراجل الملك الاهبل ده مطول فى الحرب اهو الحق اخد يومين حلوين مع المزة قبل ما نودع فى الحرب وان مت اهى تموت معايا بدل ما تعيش وتتجوز حتة نداله يعنى
    هما كانوا محصايرن مدينة اسمها بكتريا طبعا الحصار عند السور
    المزة بقى لما جوزها بعت لها
    لبست لبس رجالى وراحت علشان محدش ياخدها فى الاسر مرة صايعة بقى تقولى ايه
    المهم هى لقت ان اهل بكتريا دى بيضربوا فى جيش جوزها من من ناحية تانية وشافت انهم مش مامنين السور الداخلى للبلد كويس فاشارت على المخفى جوزها انه يضرب السور وهما مشغولين فى الضرب من الناحية التانية ومش مامنين السور كويس
    راح عم منونيس قال كده للحج نينوس وقاله دى شورة القردة مراتى راح الملك اداها فرقة وهاجمت بها المدينة واحتلتها نسوان جدعان مش احنا
    الملك طبعا عجبته المزة دى فقرر يتجوزها ويدى بنته لجوزها
    وبما ان جوزها كان اعمى واطرش ومش شايف غيرها قتل روحه وريح الناس
    واتجوزت الوليه الملك يا اخنى ولا همها الراجل اللى مات

    فيه بقى قصتين قصة بتقول ان جوزها الملك مات واوصى لها بالحكم لان ابنهم نيناس كان صغير فى وقت موت ابوه
    وقصة تانية بتقول انها اترجته يسيب لها الحكم خمسة ايام فطاوعها الاهبل راحت قاعدة على العرش ومنزلتش لزقت فى الكرسى

    وامرت بقتل الراجل وريحت راسها معرفش طبعا ايه الاصدق فيهم
    واول ما خدت الحكم قررت ان اسمها يفضل العمر كله
    فبدات تشيد بابل ومشروعات اثرية زى البروج والحيطان وعملت حديقة كبيرة جدا قرب جبل بجستانون وحديقة تانية جنب مدينة شاوون
    وعملت لنفسها قصر فخم فى صخرة فى مدينة مديا او قريب منها
    وطبعا الغرورو خدها وفكرت تهاجم الهند ولان الهند فيها افيال كتير فكرت فى حيلة انها تغطى الجمال بقماش اسود علشان تخوف الهنود ويفكروها افيال
    وطبعا اكتشفوها وهزموها واتصالحوا على تبادل الاسرى
    ولما رجعت بابل لقت ابنها نيناس اتامر عليها وخد الحكم فقتلت نفسها اعتقادا منها ان كده هتبقى من الالهه
    وتوتة توتة خلصت الحدوتة حلوة ولا ملتوتة؟
  3. يابنتى مفيش حاجة وصلت اناببعتلك وانت مش بتردى يانوجا
    تقريبا الياهو فى حاجة

تابعي تجارب أخرى من هذا القسم.