صباح الليل بنات
كيفكم وشخباركم وحدة وحدة؟؟ إن شاء الله طيبوووون
ومبروووووك لكل البنات اللي نزلت أوزانهم واللي ثبتوا أوزانهم
وعقبال البقية يارب وأنا منهم لأني زدت كيلو من يوم من بدت المسابقة
بكرة أنزل نتيجتي إن شاء الله تعالى
زملكاوية إزيك يا حببتي أخبارك إيه ؟؟
مبروك عليكِ الرشيقة الأولى للأسبوع الثاني
وممتاز ثباتك عالوزن لأن 3 كيلو ونص بأسبوع مش قليل
فكويس إنك ثبتي دا الأسبوع
والمصري آه بحب أتكلم تسدئي حسيت لساني بدى يقلب مصري
حتى لمن أتكلم مع أهلي فصايرة أخفف منه
شريفة الحجاز جربيها والله روووووعة و إدما1111111ن
بنت أختي قبل فترة جات زارتني وعملتها عشانها وأكلتها
بعدها بكم يوم اتصلت بي تبغى الطريقة
وعلى قولتها مشتهيتها كني أتوحم عليها " هيا مش حامل "
بس لا تعمليها طول ما إنتِ عاملة الرجيم عشان ما تخربي
وسامحوني يا بنات لو أحدكتب لي شي وما رديت عليه
لأني ما عدت فاكرة اش قريت
نكمل يومياتي من أمس لليوم
الجمعة مشيت ساعة عالسير بالصباح
بعدين طلعت عند الوالدة وأكلت منجا وتفاح ونزلت بيتي
رحت عند الوالد عالغدى وتغديت سندويش كودو دجاج وشربت بيبسي دايت
وووبس ما عد حطيت حاجة في فمي وخرجت في الليل رحت السوق والدانوب
يعني مشيت لي فيهم وقضيت طلبات وانتهى يومي
السبت طلعت عند الوالدة وأكلت شوية طعيمة ومش طعمية
اللي ما يعرفها لا يسألني اش هيا عشان ما راح أعرف أشرح
بعدين عملت لي بيضتين مسلوقة
أكلتهم مع ربع رغيف عيش مصري وشطة وبيبسي دايت
ونزلت بيتي ومشيت عالسير مدة ساعة والحمدلله
هذا يومي لليوم
على فكرة يا بنات أنسب وقت للرياضة الصباح بدري قبل ما تاكلي أي شي
وكمان بالليل أو عالمغرب لأن عملية التمثيل الغذائي بتبدأ تبطء في دا الوقت
لذلك الرياضة هنا تنشط لك عملية الأيض
واللي تاكل فاكهة أنسب وقت لاستهلاكها بالصباح برضو عالريق
لأنها تنظف الجسم والأمعاء من السموم
وأكبر خطأ إنك تاكلي الفاكهة بعد الأكل لأنها ما تحتاج وقت للهضم
وتمرللأمعاء في خلال ربع ساعة ما عدا الموز يحتاج لحوالي ساعة إلا ربع
بينما الأكل لازم له وقت حتى يتهضم
وبالتالي لو أكلتي فاكهة بعده راح تتخمر في معدتك
يوميات المجموعة الأولى (من وزن 69 وأقــــــــل) / رشيقات2007 (4)
متابعة النقاش، صفحة 325