طريق رشاقتي بإذن الله ✨

الأربعاء١٢/١٨
الحمد لله على نظامي وخطواتي


اليوم شفت أخصائي تغذية
سبق وقدم نصيحة للي خربطوا بالعيد
وهي زيادة الخطوات ثلاث آلاف خطوة أو خمس آلاف خطوة
عن خطواتك المعتادة .. إذا خربطت يوم زد الخطوات يوم
إذا يومين زد يومين وهكذا بعدين ارجع لخطواتك المعتادة
وكثير أرسلوا نتائجهم استفادوا مرة
وطبعاً ماينصح بتقليل الأكل عن المعتاد في نظامك لأنه يسبب ضعف النشاط ..
( ناوية أطبقها لو لخبطت .. وإن شاء الله ما ألخبط)
يارب أعنّي وأنت المعين سبحانك ✨

الخميس ١٢/١٩
الحمد لله اليوم خلصت مشي على الجهاز بدري لأن وراي مشوار
وأكلت وجبتي وشربت نسكافيه وصرت أضع معه حليب شوي
يشبع مرة والحمد لله ..
أهلي يمزحون معي برجيمي لأنهم متعودين علي كالعادة أشد حيلي
شهرين ثلاثة ثم أمل ..
وأكثر فترة سويت فيها رجيم منضبط كانت ٤ شهور
لكن بإذن الله هالمرة ناوية أستمرررر ومطولة بالي
والسر هو ..
كثرة الاستعانة بالله تعالى✨
والله اليوم كان مالي نفس ومزاجي منعفس
قعدت أكرر( لاحول ولاقوة إلا بالله ) باستشعار
ماحسيت إلا وأنا متجهة للجهاز ..
ومرات أحس كسلانة ونفسي أطلب قهوة حلا فطاير
لكن يأذن وأجلس أردد مع المؤذن ثم أرفع يدي أدعي ربي يبلغني الرشاقة على صحة وعافية ويعيني أستمر والحمد لله على طول ترتفع الهمة ..

الجمعة ١٢/٢٠
الحمد لله على نظامي وخطواتي
وطلعت اليوم ومن فضل الله شافني أخوي
قالي ناحفة ..ما أدري اللبس له دور أو فعلاً بدا يبان عليّ
يارب يكون بدا يتضح على شكلي ويارب أستمرررررر

ما شاء الله تبارك الله
استمررري
وصراحة شجعتيني
أهم شيء تاخذين قياسات جسمك

لأن الميزان مب دقيق غالبا لأن الجسم عبارة عن (سوائل، دهون عضلات) ممكن اثنين نفس الوزن لكن الشكل يختلف، هذا جسمه أغلبه عضل، وهذا دهون.